maison de joelle salon صالون جويل -جدة

بأذن الله اليوم بذكر كل تفاصيل زيارتي وتجربتي لصالون جويل 

اللي فتح دوبه في جدهـ 

موقعه شارع التحليه خلف القثمي للأقمشه 

رقمهم 0566882700

قبل ما أبدأ حبيت اتكلم عن شغله صايره

 الكل مستغرب انو ليه كلكم رحتو لجويل 

صالون جويل دوبه فاتح 

وكلمو بعض المدونات انو يجو ويجربو اي شي حابينه بالصالون 

أنا كمدونه بذكرلكم رأيي الشخصي سواء عجبني ولا ماعجبني 

ومافي شركة أتعاملت معايا وفرضت عليا أمدحها !!

واذا حصل هذا الشي انا اللي بعتذر لهم لانهم غير صادقيين 

أنا مقدره خوفكم اننا نجامل ونمدح ونضحك عليكم 

لكن بقول لكم شغله 

( انا اخاف ربي وهذا يكفيني , سواء صدق البعض أو لم يصدق ) 

في بالي كلام كثير لكن أفضل اني أحطه لكم ببوست خاص عشان تفهمونا كمدونات 

نرجع لبوستنا الجميل الريلاكسي 

اللي كلمتني مس رؤى كانت بقمة اللطافه ماشاء الله عليها 

الصالون راقي جدا وحبيت انهم دقيقين بالمواعيد وهذا الشي لاحظته من قبلها بيوم دقو عليا للتأكيد وانو لو صار تاخير حيتكنسل الحجز

لأنهم مايستقبلو اعداد هائله زي اللي يصير في بعض صواليننا 

ياخدو زباين على قدهم ويحددو لهم موعد الخدمه  مثلا ( الخدمه هذه من الساعه 2 الى الساعه 4 )

أنتي موعدك كذا كذا 

كل شي واضح لك مو تروحي الصالون ماتدري متى تخرجي 

مره قدرت لهم هذا الشي 

شغل بروفيشنال 

الحمدلله انا كمان ماتاخرت على موعدي جيت قبل الموعد 

موعدي كان من 2 الظهر  الى الساعه 10 بالليل 

حددتلي الموعد بناء على الخدمات اللي اخترتها 

اخترت 

_ قص وصبغه 

_ بديكير ومناكير ( سبا ) 

_ مساج 

_ بيرم للرموش 

_ وهما اضافولي مساك قلام قلو للبشره 

أخذتني مس رؤى جوله عالصالون ولقطت لكم صور كثير أتحمست شويه خخخخخ

دخلتني غرفة مدام جويل حسيت استحيت شويه ههههههه 

هنا قسم الميك اب 

وهنا قسم الشعر والصبغات وبسم الله نبدأ بأول خدمه 

جاتني مس ربى وهي اللي بتعملي شعري عشان تعرف انا ايش ابغى وكمان تقترح عليا الألوان اللي تناسبني 

انتو عارفين اني عملت سحب لون العيد اللي فات 

ودحين طلع لي شعر جديد ماحبيت أني اعمل جذور وبرضو اسحب لون للشعر الجديد 

قلت لها هذا الكلام وقالت لي معاك حق 

حسيت أنسب شي لشعري حاليا هو الأومبري 

( الأومبري 3 ألوان الجذور والوسط والفاتح اللي تحت )

قالت لي الوسط بتخليه بلون شعري حاليا 

وبس تفتح لي الأطراف وتصبغ لي الجذور بني غامق 

حبيت انها فاهمه لطبيعة شعر الزبونه وأتوكلنا على الله 

في الصالون يتستخدمو 3  ماركات للشعر
_ ات فاكتور اللي عملت عنها ريفيو هنا 
_ لوريال
_ كريستاس

صبغتي مرره طولت قعدنا للساعه 5 ونص 

جاتني مس رؤى تقولي انو الصبغه مره طولت خايفه اننا مانلحق على بقية الخدمات 

مارح أكنسل لك شي بس اذا ماقدرنا اليوم نعمل موعد ليوم تاني 

مس رؤى ماشاء الله كانت زي النحله عالصالون كله

 تدور عالكل وتشوف ايش فيه تذكرك بموعدك بعد الخدمه الثانيه وتركز عالعاملات بالمواعيد 

مره حبيتها انسانه بروفيشنال ولطيفه وجمممميله جدا ماشاء الله 

ويعدي يومي من غير قهوه ؟؟ لا طبعا هههههه لازم اشرب 

بعد ماخلصنا من الصبغه عملت لي جلسة معالجه للشعر المصبوغ حطت لي باور دوز من لوريال ريحته تجنن وتحسي شعرك امللس وناااعم ماكأنك صابغه ( له أنواع ) للشعر الجاف والتالف والمصبوغ 

وعملت لي مساج لفروة الراس حسيت ودي اناااااام استرخااااء يجنن

استشورت لي شعري وبصراحه مره عجبتني الصبغه رضيت عنها تماما ربي يعطيها العافيه 

النتيجه جدا شبيهه بهذه الصوره 

نجي للخدمه اللي بعدها بوديكير ومناكير ( سبا) 

كل المنتجات اللي مستخدمينها بهذا القسم من O.P.I 

مره حبيت السلاسل هذه بالديكور 

كراسي البوديكير معاها مغسله  كنت ميته بررد قلت لها تحط لي مويا دافيه وصار :)

والكرسي نفسه يعمل مساج 

أنا سلمتهم نفسي وقعدت العب بريموت المساج هههههه 

طيب كيف يعني بوديكير( سبا )

 في البدايه مسكت يدي وعملت لي سكراب الين الكتوف 

ونفس الحكايه لرجلي المفروض الين الركب بس كان بنطلوني سكيني ماقدرنا نرفعه كثير هههههه 

عاد ماري اخذت عليا تقولي مره ثانيه البسي قصير هههههههه حاضر 

أول شي سكرب بعدين ماسك بعدين غطت يدي ورجلي بنايلون وبدأت تشتغل عالأظافر وتعملي مناكير 

أخترت فرنش ستيبز لانها الوحيده اللي احب اعملها بالصوالين 

الباقي مقدور عليه بالبيت هههههه ( تخطيط ) 

وهذول الجميلات ماري وستيلا اللي عملو لي البوديكير والمناكير 

بعد ماخلصت رحنا على المساج والمعالجه له دور خاص راااايق وهادئ والأنوار خافته 

هذه اول مره اعمل مساج بره البيت

ولما عرفت ماري قالت لي بعملك مساج سويدي عشانك أم وجبتي أطفال لازم نشيل التوتر هههههه 

يالله حاولي ياماري أتحداك  ؟ ههههههههه 

المهم الغرفه مريحه وعلى ضوء الشموع وتاخذي راحتك في التغير 

ماري مبسوطه أني مخليتها المودل ههههه ياحياتي تتزبط وتوقف تسوي حركات 

بس صراحه رهيبه وشغلها جميل 

اللي بعدو 

غرفة تنظيف البشره

واللي بتعملي الجميله ( نجمه )

بدأت بماسك قلام قلو الأسود 

أنا قبل جربت الأبيض وذكرت لكم تجربتي في الأنستغرام 

سألتها ايش الفرق بين الأبيض والأسود 

قالت أنو الأسود ينظف اكثر ويخلي بشرتك متوهجه أكثر 

يعني كانه الأسود فيه مركز اكثر

ولفتت نظري بطريقة أستخدامه 

استخدمته بفرشه ومسحت مسح خفيييييييييف جدا عالوجه 

مافي لا طبقه ثقيله ولا طبقه خفيفه 

لا مسسسسح فقط وقالت اكبر غلط انك تستخدميه زي الماسكات العاديه 

والأسود تأثيره يدوم لثلاث ايام 

بس مانشف مسحته وبجد ماشاء الله حسيته أفضل من الأبيض مررره حسيت وجهي منوووور ونظيف 

الظاهر برجع أشتري الأسود 

الرموش فيه خدمتين لها 

الأولى هي تركيب رموش دائمه تقعد من شهرين الى ثلاث شهور وبعدين تجي تعملي رتوش فقط 

( صراحه مره كان نفسي اعملها بس حرررام أنتبهو مو أي شي نعمله انا رموشي مو كثيفه ومره كان نفسي فيها بس من ترك شيئا لله عوضه الله خيرا منه , فيه ناس بيجو يقولو فيه شيوخ  حللو بالنهايه كل واحد يسوي اللي هو مقتنع فيه  ) وانا مقتنعه انها حرام وطول عمرنا نعرف انو الأي لاشز حرام بس للأسف كثير تهانو فيها 

المهم الخدمه الثانيه هي بيرم للرموش 

يعني بس تلف لك الرموش وتصير اللفه دائمه حدود 5 اسابيع وأذا كانت عينك دهنيه ممكن تكون 4 اسابيع فقط 

ايش اللي لاحظته 

انا قلت لكم رموشي مو كثيفه 

هل فيه احد لاحظ اللفه لا ههههههه بس انا لاحظتها 

_ حسيتها ريحتني من حكاية النظاره دايم رموشي تخبط بالنظاره واذا كنت حاطه ماسكارا توسخ العدسه 

_ الشي الثاني صرت أستخدم اي ماسكرا خفيفه وتكون النتيجه حلوه 

أنا اعشق ماسكارا شانيل لانها تلف لي رموشي وتكثفهم 

الأن اقدر أستخدم اي ماسكرا ثانيه ماتلف الرموش عادي 

أنتهى يومي في صالون جويل
جدا  جدا استمتعت صالون راقي بمعنى الكلمه من ديكور لخدمات لعاملات لاستقبال
وحيكون من أفضل صوالين جده
وطبعا صوالين جويل مو نحن اللي نعملها دعايه هي ماشاء الله أشهر من النار عالعلم
ومره حابه اشكر جويل ومس رؤى عالفرصه الجميلة

بالنسبه للأسعار
كلها موجوده تحت