مشواري مع ال5 كيلو

أضفت اليوم ( الخميس)  بأخر البوست 

سلام لكل جميله تدخل مدونتي وتقرأ كلماتي 

البوست حيكون فيه أبدايت يوميا ( بنهاية اليوم )

كل يوم بأضيف عليه يوميات أكلي وتماريني 

ماني عارفه حيكون مفيد لكم أو لا 

اليوم أول يوم بمشواري للتنزيل 5 كيلو من بقايا الحمل اللي للاسف مو راضية تنزل من فتره 

تعبت معاها منجد

بتحسو خمسه كيلو قليله صح وممكن تنزل بسرعه واني قاعده اتدلع هههههه بقولكم لا 

انا قصيره واي كيلو زياده يبان عليا بشكل واضح 

بلس انو جسمي جدا صعب ماينزل بسرعه ويعلق ويثبت بشكل أستفزازي 

الى أن اوصل لهدفي 

( كل يوم بصور أكلي واحطه يمكن اعلق على وجبات معينه لان ماعندي ابتكار بالأكل 

ويمكن الوضع يتغير 

مدري نشوف ايش بصير لاني والله مدري هل بلتزم ولا لا :( 

( حتستغربو اني أوقات ما أفطر واختياراتي بعضها غلط
 بحط ملح وكاتشاب وصوصات ومدري ايش 
مبدأيي أني مارح احرم نفسي بالعكس ابغى يومي طبيعي و وجبتي لزيزه +  كيمه بسيطه + بدون نشويات او نشويات كميه قليله
هذا يكفيني مبدئيا )

OK

بسم الله نبدأ 

♥

DAY 1

 الأربعاء 29 رجب 

صحيت الساعه 3 ونص شربت كوب أمريكانو بلاك كوفي بدون سكر كالعاده 

 ( شربت مويا قاروره صغيره قبل الأكل ) 

والغدا صدر دجاج مشوي + سلطه خس وخيار معاهم خل وفلفل وملح 

الوجبه شبعتني 
بعد ساعه حسيت نفسي جعت وشربت قاروره مويا ثانيه 
ونص كوب سحلب
والعشاء زبادي 
وطبعا المويا شربتها بكثره تقريبا 4 مويا صغير 
اخر الليل مرره جعت اكلت مشمشتين صغيره :)






♥
DAY 2
يوم الخميس 30 رجب

برضو صحيت عالعصر فطرت بيضتين مسلوقه مع شريحه توست اسمر 
وعالمغرب رحنا مطعم فيرووز التركي طلبت اسكندر وما اكلت العيش اللي تحته بس اللحم تقريبا اكلت نصه مو كله 
واكلت كم لقمه طاجن لحم بدون عيش بالشوكه اكلتها 
طلبت مويا ( دايم اطلب بيبسي او سفن :( 
وطول اليوم وانا اشرب في المويا احس بطني منتفخه منها القاروره ابو لتر ونص قد راسي خخخخخ
ومشتهيه شاهي لسه ماشربت بس يمكن بالليل ويمكن ماشرب 
طبعا شاي بشربه بدون سكر او ملعقه جدا صغيره سكر 
وبس هذا يومي الثاني :) 


♥
DAY 3
يوم الجمعه 1 شعبان

يوم الجمعه هو اكثر يوم أخاف منه هههههه لانه يوم زيارتي لأهلي
مغريات من كل حدب وصوب حليات على عشايات على شاهي قهوه كوفي
اليوم كمان كان عندنا حفلة أختي لعيالها كيكات وأغراءات تبكي
في العصر أول ماصحيت كنت بموت جوع بس كنت مشغوله بالتجهيز
أكلت سلطة تونه بأعتبارها فطور وغدا
رحت لبيت اهلي شربت قهوه عربي وقطعه صغيره تشيز كيك والله صغيره ترى :(
عالعشا أكلت سندوتش صغير وتبوله وسلطة تفاح وحبتين ورق عنب ونص كبه
طبعا ابدا ماشبعت وكان ودي بساندوتش ثاني بس مسكت نفسي الحمدلله
بعدين اخر الليل شاهي بملعقه صغيره سكر  وبس قفلت يومي
احس تمام الحمدلله وترى كان ممكن اخبص اكثر بس ربي ستر هههههههه



♥
DAY 4 
السبت 2 شعبان

نظامي بالنوم بدأ يتخربط أكثر وأكثر 
اليوم صحيت 5 العصر 
شربت شاي لاتيه بدون سكر 
وبعد المغرب جهزت الغدا صدر دجاج مشوي + خضار ساتيه + اربع ملاعق مكرونه حمرا 
حبيت اضيف شويه نشويات عشان الدوخه 
والعشا عالساعه 11 ونص 
كوب شاي + شريحتين صغيره توست اسمر جبنه خاليه الدسم ولبنه صغيره 
والحمدلله من دحين للساعه 7 الصباح كل اللي بسويه اشرب مويا 
 أول يوم جوعت كثيرررر 
الأن احس تمام ما ابغى اكنسل وجباتي الأساسيه بس لازم ادخل بينهم سناكات وارتب نظام نومي شويه 

وأنتو ايش اخباركم فيه أحد متابع معايا ولا بطلتو :( 




♥
DAY 5 
الأحد 3 شعبان

اليوم الخامس وصل والحمدلله لسه ماشيه بنظامي أعتدال وتخفيف ماني حاسه بضغط الريجيم والدايت 

صحيت اليوم الساعه 3 العصر مع اني ميته جوع بس مالي نفس اكل شربت كوب كوفي+ ملعقه صغيره سكر
وشربت علبتين مويا صغيره 
 عالساعه 9 اكلت وجبتي الأساسيه كان الأكل هندي 
اخذت دجاج بالخلطه مع 5 ملاعق رز وخياره والحمدلله شبعت 
عالساعه 11 اتعشيت موزه وكوب لبن 
مره خايفه من اللبن لان معدتي تتحسس من اللبن والزبادي بس الله يستر 
قفلت عالأكل خلاص وبأذن الله بكمل عالمويا 

امس الفجر جعت واكلت سناك خياره +7 حبات زيتون 
أحلى شي وقت الريجيم تخلي الخضار والفواكه موجوده دايما تنقذك لما تجوعي بوقت غلط 
تصبري نفسك فيها 
عشان عيونك ماتروح عالأندومي ولا عالبطاطس والشبسات  :( 

عشان كذا ثقلت اليوم عالعشا خليته لبن وموز الأثنين ثقيله ومفيده ونشوف أن شاء الله ما اجوع 

ها أشوفكم بكره ان شاء الله 
بوزن يوم الأربعاء وبشوف قد ايش نقصت بس مارح أتأمل كثير لان الميزان دايم يخذلني :( 



♥
DAY 6 
الأثنين 4 شعبان

اليوم الشهيه مسدووووده

صحيت 2 الظهر شربت مويا 

عالساعه 3 اتغديت عشان كنت ناويه اطلع فلازم اكل كويس 

صدر دجاج وخضار بالفرن + 4 ملاعق رز ابيض _ وكمان نص الصحن ما أكلته :( 

عالساعه 5 شربت شاهي + بسكوت بالهيل 

ماخرجت من البيت فقعدت اشرب مويا ونمت بدري عالساعه 10 ونص تقريبا ودوبي صحيت 3 الليل اخذت تفاحه 

بعد الفجر برجع افطر وأبدأ يوم جديد بأذن الله 

DAY7 
الثلاثاء 5 شعبان

سلاااام 
اليوم صراحه اكلت كويس هههههه كويس بخبصه :)
كنت ماشيه تمام عالفجر سويت ساندوتش ( توست اسمر  بيضتين  ملسوقه وخيار وخس وجبنه قليلة الدسم 
الساعه 3 الظهر اتغديت من غدا امس صدر دجاجه وخضار بالفرن  واربع ملاعق رز وسلطه 
ماكملت الدجاجه 

في المغرب رحت المول وشربت قهوه واكلت بسبوسه جدا لزيزه بس مافتريت الحمدلله اصلا حجمها مو كبير :)
وبالليل الساعه11 تقريبا اكلت شاورما هنا حسيت اني زودتها صراحه :( 
بروق دحين وبشرب مويا للفجر وبأذن الله اصوم بكره 


♥
DAY8 
الأربعاء 6 شعبان

اليوم الثامن 
بما اني جبت العيد امس يعني اليوم لازم انتبه واخفف 
كنت صايمه الحمدلله وعالمغرب كنت مجهزه حشوة فطاير دجاج مع جزر وفلفل رومي 
حطيت لي من الخلطه على ورقتين خس واكلتها حسيت اني ارنب ههههه بس عجبتني 
بعدين كان لازم اطلع زياره 
شربت قهوه + قطعه حلا صغيره 
وبعدو كوبين شاهي وفطيره دجاج صغيرونه اكلت 2 
وبس هذا كان يومي حاسه اني جيعانه الأن بس يمكن اكلت فاكهه او خيار وزيتون شي خفيف 
والحمدلله 
سهرتي بتكون مع المويا فقط 
رح أوزن بأذن الله يوم الأربعاء القادم يكون الدايت صارله أسبوعين 
لاني ماحب اوزن بعد اسبوع تحطيم :( هههههه 



♥
DAY9 
الخميس 7 شعبان

اليوم مافي صوره :(
صحيت الظهر شربت شاي لاتيه 
عالعصر اخدت صحن صغير يجي 5 ملاعق مكرونه بالدجاج 
لكن بالليل كنت معزومه عن ناس
شربت قهوه ولوزيه قطعه صغيره 
الى الان تمام 
وقت العشا صار تخبيص 
اكلت محشي كوسا + كباب + 3 ملاعق رز 
ومكرونه مدري بس يمكن 5 ملاعق 
:( 
وام علي 
:( 
ماستحي على وجهي ادري 
نقدر نقول اليوم اوف :) 
ومن بكره مارح اكل كثير بأذن الله 
خبصت وانتهى الموضوع مارح اتحسر كثير اهم شي
هذا الشي مايتكرر صح فيه ناس من تخبص خلاص تكتأب وتبدأ تكنسل الدايت ليه ؟؟
عيشي يومك وأتلافي الخطأ هذا بالأيام الجايه أن شاء الله 



♥
DAY 10 
الجمعه 8 شعبان

اليوم اكلي كان جدا قليل تفاديا للي صار امس 
صحيت العصر شربت شاي لاتيه + ملعقه وحده سكر 
عالساعه 7 أكلت وجبتي وهي سلطه خيار وخس وجزر + حبتين محشي كوسا 
عالساعه 10 كوب قهوه عربي 
والساعه 12 كوب شاي + ملعقه صغيره سكر 
وبس 
دحين جالسه عالمويا ونشوفكم بكره أن شاء الله 


♥
DAY 11 
السبت 9 شعبان

مرحباااااااااا 

امس ما أكلت شي يشبعني صحيت من النوم ميته جوع 

سويت شاي مغربي + تفاحه للأسف التفاحه ماكان عندي وقت أكلها خليتها بالشنطه وانطلقت للموووول 

على صلاة المغرب اخذت امريكانو بدون سكر وفطره تفاح لزيززه :) 

عالساعه 11 اكلت كوب ذره 

نمت وصحيت الساعه 3  الليل ميته جوع عملت توست بجبنه قليلة الدسم + خس + شاي بملعقه صغيره سكر 

مدري ايش الحكايه اكلي  اليوم وامس مررره قليل ومو مشبع بأذن الله اكل أكثر الأيام الجايه :) 


♥
DAY 12 
الاحد 10 شعبان

ماني مصدقه عدت 12 يوم الحمدلله احس اني اتعودت ماني عارفه ايش المتغيرر دي المره 
أظن وجودكم معايا مخليني استمر وارادتي قويه الحمدلله 
سمعت انو بعد 23 يوم المعده تتعود وحجمها يصغر .. نقول بأذن الله مع بعض نقدر نكمل مو الى رمضان ولا الى العيد
 لا الى نحقق الهدف اللي نبغاه لاتخلي هدفك بسيط .. كثير قبل العيد يبغو ينحفو وبأيام العيد يجيبو العيد خلاص ماهمهم انتي مسويه الدايت للناس ...؟؟ أو لملابس العيد ...؟؟ أو لك ولصحتك ولثقتك بنفسك ؟؟؟ 
كل وحده تجاوب عالسؤال بينها وبين نفسها :)
طولت عليكم يالله نبدأ بيومي اليوم 
صحيت عالساعه 3 الظهر شربت كابتشينو وقللت الحليب + توسته بشريحة جبنه قليلة الدسم 
عالمغرب شريحتين دجاج صغيره مشوحه عالنار + سلطه خيار خس جزر
ولان مزاجي ماش خخخخ عدلته بكوب قهوه عربي + قطعه جالكسي بالبندق الحجم الميني الصغيرون 
بعد كذا مويا مويا مويا 
أحبكم وأستمروووو


♥
DAY 13 
الاثنين 11 شعبان

جدا جدا مبسوطه وحاسه نفسي خفيفه 
انا قلت لكم اني للأن ماشتريت شي للعيد .. وي اشتري بقياسات جديده وبأذن الله يصير 
اليوم الصباح بدري فطرت بيضتين مسلوقه + خيار + طماطم+ شريحه توست أسمر وعصير برتقال كان فطور دسم الحمدلله 
نمت وصحيت العصر شربت أمريكانو + كستناء مشويه 
وعالمغرب جابو البيك وطبعا مارح احرم نفسي منه :( 
اخذت 4 حبات قمبري وقطعه جدااااا صغيره صدر دجاج  بدون جلد طبعا 
من الساعه 9 ونص الى الساعه 10 خرجت امشي 
بأذن الله حمشي مرتين أو ثلاث مرات بالأسبوع 
وبسسسسس
أشوفكم بكرررررره بأذن الله


♥
DAY 14 
الثلاثاء 12 شعبان

اليوم صحيت بدررري لاني نمت بدري زي الشطار 

صحيت الساعه 12 الظهر 

شربت شاي لاتيه وزودت قرفه 

الغدا عالساعه 4 العصر 4 ملاعق رز ابيض و4 حبات كباب بدون زيت + سلطه 

سناكي كان كوب قهوه عربي + بسكوت صغير 

والعشا عالساعه 11 ربع رغيف أسمر بشريحة جبنه قليلة الدسم مع شطه 

وبس

اشوفكم بكره مع الميزان بأذن الله :)

♥
DAY 15 
الأربعاء  13 شعبان

اليوم يوم الميزان 
كنت حاسه نفسي اخف بكثير ومتوقعه نزول بس مو كبير لاني عارفه جسمي كووويس 
ماينزل بسهوله 
صحيت الصباح ووزنت والحمدلله طلعت نازله كيلو ونص في اسبوعين يمكن بعضكم يشوفوها قليل
انا اشوفها مرره حلوه بالذات اني ماحرمت نفسي من شي 
قررت اعطي جسمي اوف واعيش حياتي اليوم 
فطرت بره طلبت بيض فاهيتا الكميه كبيره اكلت نصها بس 
عالمغرب رحت لاختي وطبعا هنا يجيكم التخبيص 
قهوه عربي  وحلا اكلت نصه بس 
عالساعه 10 شاي ومكسرات 
عالساعه 11 ساندوتش شاورما صغير وبسسس قفلت 
ومن وقتها وانا اشرب مويا 
طبعا بما اني اليوم تخبيص بكره لازم انتبه واشد الحزام بدون دلع 
وموعد الميزان الثاني قبل رمضان ان شاء الله :) 
وانتو ايش نتايجكم ؟؟؟؟


♥
DAY 16 
الخميس  14 شعبان

اليوم حاولت ما اخبص ابدا 
صحيت العصر شربت شاي لاتيه 
عالعشا اكلت صدور دجاج مع خضار ساتيه 
عالساعه 11 شربت اسبريسو وبعدو بساعه اكلت 3 تمرات وطول اليوم قاعده اشررررب مويا 


♥
DAY 17 
الجمعة  15 شعبان

تأخرت عليكم من أمس الاب توب مافيه شحن ودوبي شحنته 

امس كان عند اهلي قعدت للمغرب ما اكلت شي بعدين اكلت نص سندوتش قمبري مره صغير عشان يسكت جوعي 

والقهوه والحلا قطعه صغيره مره ماخبصت الحمدلله 

عالعشا تقريبا 5 ملاعق

 مكرونه صيني و4 ملاعق باشمل ( مره كنت جيعانه ) 

كوب شاي بملعقه صغيره سكر 

وأخر اليوم شربت قهوه تركي بدون سكر 

ماحبيت يومي ونظامي بالأكل بس سويت اللي أقدر عليه :(

وشربت مويا كثير 

♥
DAY 18 
السبت  16 شعبان

يوم السبت صحيت عالعصر سويت توست تونه وخضار + عصير برتقال جزر 
فكان كأنه فطور وغدا 
رحت للمول وشربت تركش كوفي + قطعه صغيره تويست بالشكولاته والجبنه 
والعشا كان فول وتميس :) 
عالفجر جعت وأخذت قطعه صغيره تميس مع مسحه جبنه كاسات وشاي


♥
DAY 19 
الأحد 17 شعبان

اليوم الأحد صحيت عالمغرب شربت امريكانو بدون سكر + 3 تمرات 
العشا هو الغدا وكان متأخر اخذت صحن سلطه + 5 ملاعق رز + ايدام خضار 
بعدها بساعتين اكلت نص موزه 
والأن بكمل للفجر على المويا 
ويمكن اتسحر شي خفيف لاني ناويه اصوم بأذن الله 


♥
DAY 20 
الأثنين 18 شعبان

اليوم كنت صايمه 

فطرت كوب قهوه امريكانو +٣ تمرات 

بعدها بساعه تقريبا دجاج مشوي 

( اوقات اذا ابغى شي صحي ومالي نفس ادخل المطبخ نهائيا . اول شي افكر فيه الطازج .. احسه انسب شي صراحه )

عالساعه ١١ تقريبا ٥حبات بطاطس ( كان نفسي فيها:( 

والسحور الساعه ٣ ونص سلطه فواكه مشكله 

ومويا مويا مويا طول اليوم 

♥
DAY 21 
الثلاثاء  19 شعبان

برضو صايمه الحمدلله 

فطرت مويا و٣ تمرات 

بعدها بساعه ونص تقريبا اكلت اندومي مع شويه دجاج 

( طبعا انا من عشاق الاندومي وصارلي تقريبا ثلاث اسابيع ما اكلته فمرررره مشتهيته ماكلته كله حطيت لبنتي معايا 

بعد كذا ماكلت شي عالساعه ٢ شربت كوب عصير برتقال 

جيعانه بس مالي نفس اكل 

يمكن عالفجر ابدا فطور يوم جديد :)

♥

DAY 22 

الأربعاء  20 شعبان

فطرت من الفجر ساندوتش بيض مقلي مع نتفه زبده + جبنه قليلة الدسم ( عيش حب ) وشاهي 

صحيت الظهر شربت كوب صغير عصير برتقال 

عالمغرب اتغديت صحن بطاطس مسلوقه +سلطه 

عالساعه ٩  كنت بزياره اخذت قطعه كيك صغيره مع قهوه ،، ومع الشاهي  ١ميني بيتز

والسحور سلطة فواكه 

وبكره صيام ان شاء الله 

♥

DAY 23 

الخميس  21 شعبان

كنت صايمه الحمدلله 

فطرت تمره ومويا 

لعدها بساعه جهزت غدايا صدر دجاج بالفرن + خمسه ملاعق رز

وانا اكل اتفاجأت اني من ٣ لقمات شبعت وماعد ابغى

 فا اكلت بس ثلاث ملاعق رز وكم قطعه دجاج ماكملت الصدر كله 

عالساعه ١١ تقريبا شربت كابتشينو +ملعقه صغيره سكر 

وكنت شغاله مويا مويا مويا هههههه 

جا الفجر شربت كوب عصير برتقال وبسكوت ابو قشطه حق البزوره ههههه 

♥

DAY 24 

الجمعة  22 شعبان

اليوم كلو عالمشروبات 

عالمغرب شربت شاي مغربي +3 حبات ساندوتش حلوم 

والعشا ٣ ملاعق رز 

عالساعه١٠ كوب شاي + ٣ حبات ورق عنب 

وعالساعه ١ كوب امريكانو +قطعه صغيره شوكلت 

بكره السبت حيكون off بس بانتباه اكيد 

♥

DAY 25 

السبت   23 شعبان

اليوم للاسف مافي صوره ومالحقت اصور 
كان عندنا حفله بنت أختي وكنت عارفه انو المسأله فيها تخبيص هههههه 
عالعصر في الطريق اكلت نص كرواسون 
بعدين قهوه وقطعتين حلا :(
وعالعشا اكلت برغر حجمه صغير والله :) وسلطه كوب صغير 
ويمكن 4 حبات بطاطس 
كوب شاي 
بس حاولت اني ما ابدع بس دا اللي طلع معايا ههههه 
بس احلا شي لما اخواتي لاحظو أني نحفت ماتتصورو قد ايش هو شعور جميل 

♥

DAY 26 

الأحد   24 شعبان

اليوم اكلي قليل وغير مفيد اطلاقا بس كنت مشغوله وسكت جوعي بالموجود 

صحيت العصر شربت مويا 

عالمغرب تقريبا ٦ اكلت صحن صغير مكرونه مسلوقه ساده 

بعدين رحت عالسوبر ماركت ومارجعت الا الساعه ١٢ 

وكنا اخذين معانا فطاير جبنه ولحم اكلت منها تقريبا ٣ حبات مع بيره اناناس وبس 

♥

DAY 27 

الأثنين   25 شعبان

اليوم كانت وجباتي كامله بس بكميه قليله 

عالفطور شربت شاي بحليب + قطعتين فطيره 

عالغدا سليق ودجاج بالفرن الصحن صغير بس ماكلمته ولا كملت الدجاجه 

المغرب شربت قهوه مع قطعتين ميني  كوكيز

والعشا كان اصابع دجاج بالفرن اكلت وحده بس + كم حبه بطاطس نفسي فيها كان هههههه 

وبالاخير ختمت يومي عالسيزر الاناناس 

وبكره صيام باذن الله 

الوزن يوم الاربعاء ان شاء الله 

اذا حابين تشوفو نتايج اسرع انصحكم تعملو رياضه اذا تحبوها 

انا للاسف ماحب الرياضه ابدا واول ما ابدا اعمل شي ماحبه اقوم اكنسل الشغله كلها 

ماني حابه اكنسل الدايت اكيد  

بإذن الله مارح يكون فيه ترهل  لان الوزن اللي حابته ينزل قليل مو كثير 

لكن اللي حابه تنزل وزن كبير لازم تعمل رياضه عشان يتشد جسمها 

♥

DAY 28 

الثلاثاء   26 شعبان

اليوم مبسوطه من وجباتي 

كنت صايمه فطرت مويا بس وبعدها بنص ساعه اكلت وجبتي 

صدور دجاج + ثلاث ملاعق ذره 

عالساعه 10 الليل شربت كرك أو شاي بحليب من باباروتي 

وعالساعه 3 ونص الليل عملت سناك خفيف كوسا مشوحه بزيت زيتون مع ليمون وبهارات ايطاليه 

هذه الوجبه رائعه وتقدري تعملي بدل الكوسا جزر وفلفل رومي 

اللي حبيته وفرحني انو الصيام بالأيام اللي فاتت خلاني اتحمل الجوع اكثر وكل يوم ماعاد اجوع زي اللي قبله 

فمره متحمسه لرمضان وبأذن الله أكمل وأوصل للي أبغاه 

باقي يومين ونكمل 30 يوم 
 عرفتو كيف نظامي 
بأذن الله بكمل بنفس النظام في رمضان الله يبلغنا وأياكم 
بس مدري اذا كنت حسجل كل اليوميات لان مارح يكون عندي وقت 

♥

DAY 29 

الأربعاء   27 شعبان

اليوم صحيت عالساعه ٢ الظهر ماكان لي نفس اكل 

شربت مويا وبعدها بساعه تغديت كبسه لحم 

قطعتين لحم صغيره + خمس ملاعق رز وصحن سلطه 

عالمغرب روقت على اسبريسو + ٣ قطع بسكوت 

وبالليل اتعشيت مطبق مع فول وصارت في بطني حفله من الفول هههههه المهم دفعت الثمن مزبوط 

مره نسيت اوزن ،، باذن الله بكره 

♥

DAY 30 

الخميس   28 شعبان

اليوووووووم ال٣٠ وصل 

كذا كملت شهر الحمدلله 

وزنت والحمدلله نقصت كيلو وشي بسيط 

مع الكيلو والنصف حق الأسبوعين الأولى صارو تقريبا 3 كيلو 

3 كيلو في شهر 

صح اخبص اوقات بس ارجع اعدل ثاني يوم 

ما انقهر ولا اعصب ولا اخبص زياده لان حابه اكرن براحتي وما اضغط على نفسي لا بهدف ولا بوقت ولا بملابس ولا شي 

بطبيعتي اول ما احس اني مضغوطه واني ماحققت شي على طول اخبص الدنيا واكنسل ام الشغله 

احس بان كثير عليا ،، انا ملاحظه فرق والحمدلله اخواتي انتبهو عليا كمان ،، فابكمل زي ماهو وضعي الان 

يمكن برمضان انشغل وماقدر انزل يوميات كل يوم بس بخلي البوست مفتوح متى مافضيت بكتب لكم فيه وبعطيكم الابديت مع وزني 

اليوم ماكلت كثير ،، صحيت عالظهر شربت مويا 

وعالعصر سويت كوب شاي مع سكر دايت 

وساندوتش عيش شامي اسمر + شريحه جبنة قليلة الدسم وزيتون 

وعالعشا خرجت عالمول 

وشربت قهوه ونص تيراميسو بالتمر 

عالساعه ١٢ اكلت صحن شمام مقطع صغير وبس 

ابغى أعرف البنات اللي مشيو معايا من شهر ايش صار عليهم كيف كان نزولكم 

اهم شي عندكم المويا ولاتحرمو نفسكم من شي 

مع الحرمان حيجي الأنفجار وحتوصلي لمرحله تاكلي الأخضر واليابس 

لاتحرمو نفسكم أهم شي الأعتدال والكميات القليله