اشتراكي مع دايت سنتر ..!!

بقولكم شغله 

هذا البوست صورته وانا لسه مشتركه معاهم 

وقلت اذا شفت نتيجه بنزله لكم 

اذا ماشفت  بلاش منه

دحين قررت انزله لكم لأن مدونتي تتكلم عن تجاربي عموما سواء كانت ناجحه او لا 

وفعلا دايت سنتر دايم عليه علامة استفهام حتى وأنا ابحث عنه مالقيت المعلومات اللي ترضي فضولي 

يا منتديات قديمه وهرج قديم

 يا كومنتات بحسابهم بالأنستغرام

 وبرضو مافي موضوع مزبوط يقولي السلبيات والأيجيابيات 

وقتها اتمنيت لو الاقي تدوينه لأحد ترضي فضولي شويه ههههه 

مالقيت 

والآن انا بسويها وأتمنى انها تفيد أحد منكم 

وتجاوب على أستفساراتكم 

دايما دايت سنتر وشركات توصيل الأكل الصحي 

كانت الفكره  عجيبه بالنسبه لي ههههههه من ايام ستار اكاديمي

والله كان عندي فضول اشوف ايش فيه في كراتينهم ههههه 

 الله الله يوصلك اكل لعندك لاطبخ ولا يحزنون 

وكل مره افكر اشترك معاهم اتكاسل لان عندي بيت لازم له غداء 

يعني حطبخ غصبا عني ههههههههه 

وكنت لما افكر كذا اكنسل 

الين جاتني الفرصه 

كيف جات ههههههه من نقاطي في موبايلي 

زوجي كان معاه مجموع مره كبير من نقاطي وقالي خذيها اشتري اللي تبغيه 

لما شفنا انه دايت سنتر معاهم قلنا يالله نجرب :) 

والله ورحت 

اي فرع عادي تشتركي فيه 

فيه نوعين للاشتراك 

فيه اللي بعيادة وتراجع معاك دكتوره وتشوف ايش عندك وايش تحتاجي 

وهذا النوع انصح فيه للي عندهم حالات خاصه مثلا 

حامل ، عندك سكر عندك ضغط ، مريضه 

لازم فيه احد معاك 

النوع الثاني هو الأيزي دايت انت تختاري السعرات وتشتركي وبس بدون لا دكتوره ولا عياده ولا شي 

الأيزي دايت فيه ٣ سعرات مختلفه 

- ١٢٠٠ سعره حرارية  اشتراكه بالشهر ١٦٨٠ريال ( بدون حلا وعصير)

-١٣٥٠ سعره حرارية  اشتراكه بالشهر ١٦٩٠ ريال ( مع حلا )

- ١٥٠٠ سعره حرارية اشتراكه بالشهر ١٦٩٥ريال ( مع حلا وعصير)  

والتوصيل ٢٠٠ ريال 

تقدري تختاري اشتراك اسبوعين نص الأسعار اللي فوق لو حابه تجربي بس وتشوفي يناسبك او لا 

اول مارحت اعطوني منيو ل٣٠ يوم 

كل يوم فيه خيارات للفطور والغداء والعشاء

وتقعدي عاد تختاري اللي يناسبك 

انا كان اختياري ١٢٠٠ سعره بدون حلا وعصير،  ليش ؟ 

لان عصيراتهم معلبه الربيع وندى وغيرو 

والحلى مايستهويني كثير يعني مو فارق معايا 

بعد ٣ ايام من الأشتراك بدأ يوصلني اول  بوكس 

أول مافتحته حسيت بتناحه 

شعور حلو و غريب ههههه 

شوفو معايا 

الوجبات تجي كلها ببوكس واحد ومبرده 

اول ماتستلمي البوكس تحطي الوجبات بالثلاجه 

وكل وجبه تسخنيها وبالعافيه عليك 

فيه طريقتين للتسخين ممكن بمايكرويف 

وممكن بالفرن 

انا كنت اسخنه بالفرن ( عندي صينيه صغيره بغطاء كنت احط فيها الأكل وبالفرن ويطلع كأنه دوبه مطبوخ 

مافي اي فرق صراحه ) 

يجي مع البوكس ورقه فيها منيو اليوم 

ايش حتاكلي عالفطور وعالغداء والعشاء 

كل يوم لازم يكون فيه سلطه او سلطتين 

وحده مع الغداء ووحده مع العشاء او ممكن شوربة 

سلطاتهم مره رهيبه ومره سهله 

يعني انا دحين اتعلمت منهم طرق كثيره وبسيطه

لو تلاحظو الصوص موجود بعلبه صغيره

الأكل مره متنوع 

أول الآيام اكلت الوجبات كامله وكانت مشبعه صراحه 

ماحسيت اني جيعانه وماحسيت اني ابغى اخبص

بعد كذا بدأت اشبع منجد فا كنت اعطي بناتي بعض الوجبات لاني فعلا ماني جيعانه 

بالذات العشاء اغلب الوقت كنت اعطيه بناتي ليه 

لأن العشاء اوقات كان دسم كأنه غداء 

يعني بالراحه ممكن عشاك يكون لازانيا ولا برياني سمك 

انا ماني متعوده كذا 

دايم عشايا يكون خفيف فحسيتها ثقيله شويه 

تاكلي رز تاكلي مكرونات فيه مناقيش، سينابون للفطور كمان 

مره منوع لكن الفرق 

 مطبوخ بطريقة صحية كنت اشوف الفرق بين الصحي واللي مو صحي

بعد ما اخلص اكل

 بالذات اللزانيا مره كنت متخوفه اكلها عشاء 

بس لما سخنتها مانزلت ولا نقطه زيت 

هذا دليل انها صحيه وممتازه وكانت القطعه حجمها كويس زي اللي اكلها دايم 

بس لما خلصتها ماحسيت بتخمه ولا بشبع ولا شي بالعكس خفيفه جدا ولا كآني دوبي اكلت لازانيا 

صورت بعض الأكل للأسف اني ماصورته كله 

لكن نماذج عشان تعرفو بس 

مرت الأسبوعين وزنت لقيت نفسي نازله كيلو
 ماكنت حاسه اني اكل صحي ولا اكل دايت 

الوضع كان جدا طبيعي حتى اذا جيت اروح لأهلي اخذ وجباتي معايا ههههه 

طريقة دايت سنتر هي لايف ستايل 

يعني ماتشتركي زيي اسبوعين وتتوقعي انك بتنزلي عدد هائل لااااااا 

هم قدمولك أكل صحي لازم تستمري عشان تشوفي النتيجه اللي تبغيها 

طبعا هو مو بس للناس اللي تبغى تنحف  لا فيه للي يبغو يسمنو كمان 

بصراحه انا مررره عجبني والأكل صدمني انه لذيذذذذ 

اكثر شي حبيته 

هو ايدام داوود باشا 

اللزانيا 

فيتوتشيني 

شوربة الناتشوز 

ستيك الدجاج مع الماشد بوتيتو 

المناقيش كمان لزيزه 

غراتان البطاطا 

شوربة الحريره 

كثير صراحه بس ناسيه ههههههه 

مره انصح فيه بالذات للبنات اللي ماوارهم لا بيت ولا طبخ 

وكمان للي عندهم السكر ويحتاجو اكل صحي 

كمان اللي يبغو ينحفو بس يستمرووو اكثر من شهر 

ماندمت اني اشتركت بالعكس استفدت كثيرررر من الوجبات اللي وصلتني 

حتى في نوع الزبادي واللبن اللي يرسلوه استفدت منه 

كانو يرسلو الصافي قليل الدسم 

وانا دايم متعوده اجيب المراعي 

فعلا فيه فرررق مره حبيت الصافي واعتمدته على طول خفيف مره ولذيذ 

استفدت من السلطات كثير 

نجي عند السلبيات 

- اول شي موعد توصيل الوجبات كان يوصلني على الساعه ١ الظهر تقريبا 

يعني تضطري ترفعي وجبه الفطور لليوم الثاني 

- ثاني شي اوقات الدجاج مايكون مبهر كويس 

فيه طعم مو حلو 

ثالث شي لو يتغير العصير لشي صحي اكثر من العصاير المعلبه لان كلها سكر 

- اتمنيت لو يخففو من الرز لان اغلب الوقت ماكنت اكله صراحه 

- وكمان يكون العشاء اخف 

لكن بشكل عام مره انبسطت بالتجربه هذه 

وممكن اعيدها بوقت ثاني 

وانصحكم فيها 

وترى والله مو اعلان :( 

ماهم داريين عني ههههه 

فعلا هذه تجربتي وحبيتكم تستفيدو منها