Joelle products منتجات العناية من جويل

من شهرين 

صالون جويل قدمولي 

منتجات جويل الجديده الخاصه بالعناية بالشعر والبشرة 

!!!!

أول ما استلمتها كتبت لكم 

تفاصيل المنتجات وظايفها اسعارها 

وقلت لكم اعطوني مهله اجربها واحكم عليها كويس 

صارلي شهرين استخدمها ، قربت المنتجات تخلص 

صار عندي فكرة واضحه عنها و اقدر اشارككم فيها 

نبدأ بمنتجات الشعر 

اول شي هي شافت شعري مصبوغ وجابت لي شامبو وماسك للشعر المصبوغ 

شعري حاليا مره قصير < بوي 

الصبغه هي اللي صبغولي هيا اول اذا كنت متابعه معايا لما صبغت شعري اومبري عندهم من سنه 

عملت لي الجذور بلون بني غامق 

ايوا الان الجذور هي اللي باقيه  وماتغير لونها من وقتها 

اللون مره غامق لدرجه اوقات انسى انو شعري مصبوغ هههههه 

بالنسبه للشامبو على كلامهم يناسب كل انواع الصبغات وسألتها تحديدا ينفع للصبغات الشقراء والزيتيه والرمادية قالت لي ايوا 

<< صراحه مااعتقد  ينفع ، الصبغات هذه معروف انها تحتاج الشامبو البنفسجي لانها تتغير بسرعه كبيره ويبغالها شي خاص فيها 

الشامبو من خلاصة العنبر والكينوا 

صمت <<< جد ماني عارفه ايش اقول عنه 

عادي 

ريحته حليوه ، فيه رغوه ، ما اضاف شي وما نقص من شي 

صراحه زيه زي اي شامبو سعره ٩٢ ريال 

الماسك 

علاقه حب وكره بيني وبينه 

الماسك لطيف بمعنى الكلمه 

ملمسه مره ناعم اوقات احسه لوشن جسم مو ماسك شعر 

اغلب الماسكات تجي ثقيله شويه هذا لا مره خفيف 

نتيجته حلوه ينعم الشعر بس مو لوقت طويل احسه بس بنفس يوم الأستخدام 

بعدين عادي لو شعرك كشه بترجع الكشه 

سعره ١٣٨ ريال 

للأسف ماعجبوني مجموعه الشعر المصبوغ وما اعتقد اني ممكن اشتريهم 

حسيت نتيجتهم جدا عاديه اي شامبو وماسك من الصيدليه بيقوم بمكانهم 

مجموعة العناية بالبشرة 

وصلتني خمسه منتجات في بوكس واحد 

هذا البوكس كفيل انه يهتم ببشرتك من جميع النواحي بقولكم محتوياته 

- غسول للوجه 

-سيروم ترطيب للوجة

- كريم محيط العينين 

-كريم النهار 

-كريم المساء 

سعر البوكس ٧١٤ ريال 

المجموعه فيها السايز الكبير ، وتقدري تاخذي كل منتج لحاله مافي مشكله 

دحين بقولكم رأيي بمنتجات البشره وسعر كل منتج لحاله 

غسول wash away 

غسول للوجه 

الغسول فوم ، مو صابوني سايل

 فوم < رغوة

 نفس فكره صوابين باث اند بودي 

مافهمت ليه فوم 

حسيت لو انه صابوني سائل  افضل 

استخدمته لحاله ومع الكلاراسونك 

ريحته عاديه ، ريحة صابون يعني الناس اللي تتحسس من الروائح بيناسبهم 

برضو حسيته عادي ، ممكن ينشف الوجه وتحتاجي ترطيب بعد استخدامه 

سعره ١١٢ ريال 

سيروم Rescue Me 

هذا اكثر شي حبيته 

هو سيروم ترطيب للوجه 

مهدئ للتوتر والجفاف 

استخدمه قبل الميك اب مره عجبني وفرق معايا الميك اب كثير 

يخلي توزيع الفاونديشن سريع وسهل 

يرطب البشره ترطيب لطيف مو ثقيل 

نوعيتة الترطيب اللي احبها الخفيف البارد 

سعره ٢٥٥ ريال 

كريم محيط العينين Love Eyes 

هذا كمان عجبني 

برضو ترطيبه خفيف البشره تمتصه بسرعه 

ماله ريحه 

حلو  ، جيد 

سعره ٢٠٤ ريال 

كريم المساء Good Night 

فيه زيوت ضروريه للبشره 

يساهم في إصلاح البشره وتجديدها ليعطي بشره ناعمه ونضره 

مره جيد هذا الكريم ، عجبني 

صراحه لاحظت شعور حلو يجيني في الصباح بعد ما احطه

احس بشرتي مترطبه ونضرة بس عيبه ريحته قويه 

ريحته عطريه ريحة ورود 

سعره ٢١٤ ريال 

كريم النهار Good Day 

يغذي ويرطب البشره وفيه نسبه حمايه من الشمس اكيد 

للاسف ما استخدمته كثير لاني ما اخرج في الشمس 

فما عرفت احكم عليه 

سعره ١٣٨ ريال 

فين ممكن تلاقوها 

في صالوناتهم اكيد 

وكمان في فروع وجوه 

فيه نقطه مهمه 

المنتجات هذه فقط منتجات عناية ماتوعدك بنتايج علاجيه 

تفتيح،  تسمير ، حبوب ، مافي هذه الشغلات 

يمكن عشان كذا حسيتهم عاديين لانهم حمايه وترطيب واهتمام لبشرتك فقط لاغير 

للأمانة وحسب استخدامي لها المنتجات عاديه 

ماهي واو ، وماهي بطاله 

اذا بنصحكم بشي 

انصحكم بسيروم الوجه وكريم العينين والليل 

هذه اكثر منتجات عجبتني منهم 

بس برضو اقول مو واو 

اذا جربتي شغلات ثانيه من عندهم اعطينا رأيك نستفيد منكم