all about mascara ريفيو ل٦ انواع ماسكرا

هذا البوست من زمان نفسي انزله لكم
وأخيرا اتلححت ونزلته
الماسكرا اكثر شي احبه بالميك اب صراحه
واكثر شي احب اجربه
اليوم بعطيكم خلاصة تجاربي
وكمان بتلاحظو من البوست الفرق بين فرش الماسكرا وكل فرشة ايش وظيفتها
يعني بإذن الله حتعرفي اي نوع من الماسكرات يناسبك بمجرد النظر للفرشة





كذا ماسكرا موجوده اليوم اتكلمت عنها قبل
حبيت بهذا البوست انزلهم كلهم مع بعض عشان يكون مرجع بإذن الله لاني احب البوستات اللي كذا
واحسها أساسية ومن البوستات المهمه بالمدونة

رح أبدأ من التوب ١ 

chanel le volume mascara

حبيبة قلبي ماسكرا شانيل 

لي فوليوم دي شانيل 

اي احد يطلبني ماسكرا ما اتردد ابدا اني انصحه فيها 

والحمدلله كذا بنت اشترتها وجاتني تقولي روعه 

للأن هي التوب ون 

هي الأفضل بالنسبه لي 

وكل ماتخلص ارجع اخذها هي الأساسيه والباقي مجرد تجارب 

وظيفتها تكثيف ، تكثيف ، تكثيف 

تكثف من مرتين وماتحتاجي تعيدي عليها كثير 

أنا ما ألبس رموش ابدا ودايم ادور عالكثافه وهذه جد تعطيني لوك مسائي رائع 

تلف الرموش وهذه من أجمل ميزاتها 

ملمس الرمش جدا طبيعي ، لما تلمسي رموشك اوك عليها منتج 

بس ماتحسوها ناشفه ولا مشصبه ولا بلاستيكيه 

شايفين فرشتها 

الفرشه اللي تجي بهذه الطريقه

 تحسي اسنانها متقاربه وشعيراتها مرنه وكثيفة 

هذه من اول ماتشوفيها تعرفي انها مخصصه للتكثيف 

فا اذا كنتي تدوري على الماسكرا المثالية 

اقولك ماسكرا لي فوليوم دي شانيل وارفعي يدك 

تلاقوها بكل كورنرات شانيل 

بمحلات الميك اب الكبيره 

سعرها ١٧٠ ريال 

lancome hypnose mascara

من اكثر الماسكرات اللي برضو عليها ضجه كبيرة هي 

ماسكرا لانكوم هيبنوس  << مو هيبنوس دراما ، يختلفو 

كنت كل ما اتكلم عن شانيل 

يقولولي جربي هيبنوس 

اوك جربتها 

المنتج حلو ، بس احس فرشته ظلمته

 وظيفتها تكثف 

بس للأسف الكثافه اللي تكتل من مرتين 

منظر الرمش صار جدا ملبك 

اضطر بعدها استخدم فرشه تفكك الشعر عن بعض 

اللي عندي مو وتر بروف 

مره حاست امي حووووس اول ما جات مويا بوجهي نص الماسكرا ساحت بشكل غبي 

يعني عندي ماسكرات مو وتر بروف بس ماتسيح بذي الطريقه 

حسيت نفسي بمسلسل خليجي ابكي :( 

هذه فرشتها من قريب تشبه لفرشة شانيل بس هذه على فلات اكثر 

الماسكرا تعطيكي نتيجه حلوه اوك بس يبغالها شغل وانتباه ابعدي عن المويا مررره 

برضو متوفره بكل الكورنرات حقة لانكوم 

سعرها ماعرف كم بالزبط بس من ١٧٠ وانت طالعه 

it -lash dior

وهنا تبدأ الريفيوات السلبيه هههههه 

الماسكرا متعبه صراحه 

للأن ماعرف وظيفتها لان ماشفت اي نتيجه تستاهل انها تذكر 

يعني ماتكثف ولا تطول 

مره مره تعطي لوك طبيعي يوميه 

فرشتها مره حااااده بلاستيكيه 

هذا النوع من الفرش اول ماتشوفيه على طول تعرفي انها يومية 

ممكت تطول 

بس مستحيل انها تكثف 

جدا مناسبة للبنات اللي ماشاء الله رموشهم كثيفه 

تحتاجي تعيدي ووتعيدي وتعيدي عليها الين تبان معاك نتيجة 

بالنسبه لي غير مرضية 

سعرها ١٦٠ اعتقد اخدتها من سيفورا 

ماسكرا they're real

من بينفت 

برضو اتكلمت عنها في بوست منتجات بينفت 

هذه الماسكرا نسخه من ديور ات لاش 

نفسها نفسها 

بس احس هذه افضل شويه 

عالاقل لو تعيدي يبان شي 

بس برضو مافيها كثافه 

تطول الرموش 

تعطي الرموش ملمس بلاستيكي مزعج 

اللي احبه فيها انها وتر بروف ومنجد وتر بروف !!

 لو ايش تسوي تبكي تتروشي هي حالفه انها ماتنزل هههههه

بس تعرفو ايش 

لما احط حقة ديور مع بينفت يصيرو حلوين مع بعض << سبهان الله 

زي مايقولو ألتم المتعوس على خايب الرجاء 

ههههههههههه 

هذه فرشتها ومنجد منجد مره خطره 

والله اتعورت فيها مرتين ، شعور مره مؤلم 

مره تعور يابنات منجد حطوها وانتو مركزين 

سعرها ١٤٠ ريال اعتقد تلاقوها في سيفورا 

أخر ماسكرا 

هي الماسكرا الوبرية 

هي تجي اثنين مع بعض وحده ماسكرا 

والثانيه ستيك وفيه وبر اسود 

اول شي تستخدمي الماسكرا العاديه وبعدين الوبرية 

مره غريبه ومزعجه 

اول شي حطيتها زي ماقالو 

ومن اول خمس دقايق طاح الوبر جوة عيني 

ومره اتنرفزت لاني صرت احك عيني احاول اخرجه وانعدم الميك اب 

بعدين جربت احط الماسكرا العاديه وبعدو الوبرية وبعدو رجعت احط العاديه عشان تثبت الوبر 

اللي صار كأني العب احط وبريه وارجع احط العاديه وتروح الوبريه وارجع احط الوبريه وتروح العاديه وسرا الليل وحنا ماسرينا 

وبالاخير برضو طاح تحت عيني وانا بنص الزياره 

يعني حتى ثبات وهو اقل شي ممكن تسويه الماسكرا مافيها ثبات 

موجوده عن التاجرات وماا عرف سعرها جاتني هدية 

Diorshow Maximizer

 Lash Plumping Serum 

اخر شي ماسكرا ديور شو البيضاء 

هذا الشي من أجمل الأشياء اللي قيد جربتها 

انا لان عندي ماسكرا خفيفه زي ات لاش وذير ريل 

صرت طول الوقت ادمج ذي مع ذي 

طبعا هذا الشي يضر الرموش كثرة المنتجات مو في مصلحتنا 

وظيفة هذه الماسكرا انها تحمي رموشك هي زي البرايمر للرموش تستخدمي قبل الماسكرا 

في البدايه تكون بيضاء بعدين تنشف وتلف الرموش انتي قبل ماتنشف استخدمي ماسكرتك العاديه 

تعطيكي نتيجه ماسكرتين مدموجين مع بعض جدا جدا رائعه واحسها حل مثالي للي تدور على الكثافة 

ما اعرف كم سعرها صراحه 

وبس هذا كل شي عندي عن الماسكرات 

وبإذن الله حاطه ببالي كذا ماسكرا جديده اجربها 

منهم ماسكرا توفيسد better than love mascara

اشوفكم بالبوست الجاي إن شاء الله 

ولاتبخلو عليا بكومنتاتكم وتجاربكم هنا