Yves Rocher & Clarins Self-Tanners كلارينس وايف روشية سيلف تان

التان وما ادراك ما التان 

من العام اخذت سيلف تان ايف روشية 

اتحمست له بالبدايه ووعدتكم انزلكم ريفيو عليه 

ومرت سنه للأسف ودوبي انزله .. اعتذر بجد 

اللي ذكرني فيه او اللي بالأصح خلاني انزل الريفيو اليوم 

هو تجربتي الآخيرة مع سيلف تان كلارنس الشهير 

شوفو خصائص كل واحد منهم ....

اللي ماتعرف ايش هو التان 

هو التسمير 

دايم بالصيف الكل يحب يسمر نفسه شويتين 

يعني بحر وصيف وكذا ههههههه 

صراحه انا مالي بالتان كثير بس صرت احاول من سنه اني اعمل اللون اللي احبه 

بالنسبه لي لوني الحمدلله عاجبني 

قمحية على بياض شوية 

او قمحية فاتحة 

هذه الصوره هي مثال للون اللي احبه واللي احاول احصل علية 

طبعا عندي قناعة انو البيرفكت تان هو تان الشمس والبحر 

اذا صارت لك فرصة تعملي تان الشمس ممتاز بس لازم تكوني عارفة كل طرق الحماية والوقاية 

بالذات لو بتسويه في شمسنا العزيزة لانها بتحرقك حرررق 

السيلف تان ايش هو 

هو منتج يعطيك لون وانت قاعدة ببيتك 

بغرفتك 

والمنتجين اللي بتكلم عنهم الآن كلهم سيلف تان 

  Yves Rocher self tan

سيلف تان ايف روشية 

سمعت عنه من قبل ولما رحت اخده 

جربتلي على يدي وقالت لي خذي لفة بالسوق وبتشوفي اللون يبدأ يطلع معاك 

طبعا هو بخاخ شفاف زي المويا 

حبيت انو مايحوسك 

تبخيه وينشف بسرعه 

اتذكر اول ماجربته على يدي عجبني مره

 وجيتكم عالأنستغرام اقولكم مره حلو اللون والأهم مافي ريحه تتذكرو هههههه 

بعدين بدأ الجد

 لما جيت اسوي جسمي كامل 

طلعت ريحة :(

وما ادراك ما الريحه 

حنااااا شي مو طبيعي قرفت نفسي 

وندمت اني عملته 

اللون اعطاني اغمق من لوني بدرجه وحدة بس 

اللون اللي انا بس الاحظه بس غيري مايلاحظ ابدا 

بس الآكيد انو مو برتقالي 

لا لون برونزي خفيف مرررره 

حطيت مره ثانيه 

غمق تكه كمان بس برضو مو ملاحظ بشكل واضح 

وصرت احط احط احط بس خلاص معد يطلع معايا لون اغمق 

من وقتها مع الريحه كمان خلاص استلمت انو لونه مره خفيف ومو باين 

وقتها كان عيد وكنت مصوره يدي 

حتى اللون اللي كان موجود راح بعد ثلاثه او اربعه ايام بدون ما احس فيه 

ما اتقشر وبين الفرق بين لوني الأصلي ولون التان 

لا 

راح وانا مدري هههههه 

بعدها بشهرين رجعت اشوف الصوره حسيت اللون باين بالصوره 

لون خفيف مره 

مدري ليه ماكنت اشوفه شي وقتها 

بس برضو ابدا مايعطيكي لون تان حقيقي 

غير كذا ريحته مره ضايقتني 

وعلى فكره الريحه قعدت يومين تقريبا وبعدين اختفت 

سعره رخيص مره ب٤٥ ريال 

انصح فيه في حالة وحدة بس 

اذا كنتي خوافه ووبتجربي التان  وماتبغي لون قوي 

غير كذا ما انصحك فيه 

طبعا شايفين بالصوره التان الكريمي 

هو تان كريمي للوجه ما انصحك تسوي تان لوجهك الافضل بالميك اب 

هذا الكريم ماجربته اصلا

 كان فيه عرض تاخذي شي والثاني مجانا واخذته 

جربته كتان عادي على جسمي بس اعطاني نفس لون البخاخ 

clarins SELF-TAN

بعد ماجربت تان ايف روشيه 

قلت ابغى تان اقوى شويه 

برضو انا خوافه ترى هههههه

وما احب التان الآوفر عشان كذا جالس اتدرج بالآلوان والماركات 

رحت المول على أساس اخذ تان جيرلان 

للاسف مالقيته كان مخلص وقتها وجات البنت حقة كلارنس تقولي سيلف تان كلارنس حلو وكذا 

كنت اعرف سيلف تان كلارنس وعندي خلفية عنه 

قلت يالله اتوكلنا على الله 

سليف تان كلارنس 

يجي لون واحد 

لون العلبه نحاسي وهذا الشي خوفني شويه 

اول مافتحت العلبه حبيت ريحته 

حسيتها شكولاته شي زي كذا 

قلت الحمدلله ريحته مو مزعجه زي هذاك 

وقتها جربت على ساقي بس 

وطلع اللون بعد ساعه تقريبا 

اللون منجد برونزي على تكه آورنج 

بس مره خفيفه 

حبيت نتيجته على رجلي مبدئيا 

وجاء وقت الجد هههههههه

ووقت الجد تبان الحقيقه 

زي مانتو شايفين هي كريم كثافته متوسطه مو ثقيل مره ولا خفيف مره 

عملت جسمي كله وجلست استناه ينشف 

واستنى 

استنى 

استنى 

تقريبا ساعه و مانشف 

ولا عنده نية ينشف ابدا خلاص تحسيه اعطى طبقه دهنية عالجسم 

مارح تنشف 

وبدأت تطلع ريحة 

مو ريحة حنا لاااااا ريحة صدأ 

اهون شويه من ريحة ايف روشيه بس الملمس مستفز مره 

بالنسبه للون 

اعطاني نفس لون ايف روشيه 

لون برونزي خفيف مره ملاحظ مني انا فقط 

وعدت عليه مره ثانيه وماطلع معايا شي 

خلاص هو ذا اللون اللي طلع ومارح يغمق اكثر 

سيلف تان كلارنس موجود بفافافوم سعره ٢٠٠ ريال تقريبا 

 تقريبا هذه نتيجته اللي صارت معايا 

بعض الآوقات افكر اقول يمكن لوني مايعطي الا ذا اللون ههههه 

بس الأكيد ان شاء الله انو التجربة الثانيه بتكون لون اقوى منهم 

 ايف روشية وكلارنس 

آعطوني نفس اللون 

ايف روشية : سعره رخيص > بخاخ سهل التوزيع وينشف بسرعه 

ريحته قويه مره لاتستحمل ، ممكن تعمليه مرتين ويبان لون اكثر 

كلارنس : سعره أغلى ، كريمي ، ماينشف بسرعه وممكن ماينشف 

يطلع معاك لون واحد بس وجاي شوية على أورنج ، ريحته تهون وتقدري تتحمليها 

الأثنين ما اعطوني اللي ابغاه 

وجاري البحث ......