Dior Backstage pros . first impression انطباعي الأول لديور باك ستيج ميك اب

الأسبوع اللي فات أرسلولي ديور دبي كوليكشن الباكستيج 

زي ماقلت لكم بالأنستغرام أنو هذه منتجات لتهيئة البشره قبل الميك اب 

ماتعتبر علاجيه 

تمام 

يالله نفتح البوكس ومع كل منتج بقولكم أنطباعي الأول عنه 

لما اقول انطباعي الأول مايعني انو هذا رأيي الدائم 

ممكن مع الأيام منتج ماكان عاجبني ويرجع يعجبني او اتعود عليه 

والعكس 

ممكن منتج يكون مره عاجبني وبعدين يضرني واغير رأيي فيه 

كلو حتعرفوه أن شاء الله مع الوقت ومع بوستات المفضلات والأنستغرام والسناب شات 

راح أعطيكم الأبديت أول بأول 

نشوف المنتجات اللي ارسلوها 

  ملمع بالكولاجين   Lip Maximizer

مرطب للشفاه   lip glow

روزي قلو بلاشر   Dior Rosy Glow Blush 

سيروم وبرايمر للرموش   Diorshow Maximizer – Lash Plumping Serum 

برايمر أضاءة   Glow Maximizer

قلم هايلايتر ومصحح   Skinflash

برايمر لأزالة المسام   Pore Minimizer

برايمر للجفن   Backstage Eye Prime

في البدايه بقولكم كلام الشركه عنه 

وبعد كذا أنطباعي 

lip glow

يقولو ( بلسم للشفاه يظهر لونها الطبيعي , يتفاعل مع طبيعة شفتيك

لأعطائها لونا ورديا , يمكن أستخدامه كبرايمر للشفاه قبل المكياج ) 

أنطباعي الأول 

مرطب خفييييف . مافيه لون , ريحته خفيفه ومريحه كأني شميت فانيلا 

حطيته وأتفاجأت بعده 

جد طلع لون وردي طبيعي بشفايفي لدرجة رجعت عملت سواتش على يدي بشوف هو فيه لون ولا لا 

يعني صدقتهم في هذه النقطه جد يتفاعل مع شفايفك ويبرز لونها 

كان عندي قشور بسيطه بشفايفي بس ماحسيت فيها مع المرطب مخلي شفايفي منظرها جدا طبيعي وأملس ووردي 

يعني مرطب بيرفكت صراحه جدا جدا جدا حبيته وأنبسطت كثير أنهم رسلوه لأن كثير مدحوه ليا ومرتين اروح لسيفورا ويكون مخلص .. قعدت البنت تحاول تخليني اخذ من النوع الثاني اللي بلون بس رفضت والحمدلله من نصيبي ارسلوه ليا ههههههه

Lip Maximizer

يقولو ( ملمع كولاجين يمنح الشفاه حجما أكبر , رطبي وأملئي شفتيك , 

أستخدميه كأساس لحماية وتنعيم وتكثيف حجم شفتيك قبل وضع المكياج 

أو فوقه للمسه من اللمعان )

أنطباعي الأول 

استخدمته أول مره فوق المرطب العادي حسيته بارد وبعدين يلسع شويتين 

بس مو شي مزعج بالعكس حلو حبيته حسيته اخفي الخطوط اللي بالفم 

حتى صورت شفايفي لأخواتي ههههه عشان يشوفو 

حلو قبل الروج حطي شي بسيط منه 

جربته فوق الروج كانه قلوس عادي 

 Rosy Glow Blush

يقولو ( حمرة خدود تمنحك لمعان طبيعي وصحي  يدوم طوال اليوم ) 

أنطباعي الأول 

أول شي اللون مره مو راضي يوضح مزبوط يطلع كذا لون باربي صاقع 

صورت لكم صوره بدون اضاءه ولا تأثير عشان تشوفو اللون مزبوط 

صراحه ماحبيته .. ماحسيته يناسب لوني يبغاله بنوتات صغار لونهم فاتح بيكون كيوت عليهم 

 ملمسه حلو وناعم واللون يوضح من الأستخدام الأول 

حسيته بودري يتناثر شوي انتبهو 

هذا لونه بدون أضاءه 

Backstage Eye Prime

يقولو (يحافظ على ظل العين 10 ساعات , يمنع تجعد العين ويثبت الظل ) 

أنطباعي الأول 
ملمسه لونه مره ذكرني ببرايمر ماك بينت بوت
حطيته ووزعته بطرف اصباعي 
في البدايه تحسيه ثقيل شويه لما توزعيه كويس تحسي انك دحين تقدري تلعبي لعب بالايشادوز 
اخفى لون الجفن تماما واعطاني لونه بيس رايق 
حطيت لون ناتشورال بني خفيف بشوف كيف يطلع اللون ويوضح 
بصراحه مره حبيته 
منجد وضح الايشادو كماان حسيت الجفن راكز مافي خطوط 
النتيجه مره مرتبه حتى لو حطيتي لون واحد 
كنت رايحه لأهلي وانا مره اطول عندهم يعني تقريبا قعد الأيشادو ماتغير 9 ساعات 
الين رجعت البيت ومسحته وهو زي ماهو ماتغير .. جميل 

Diorshow Maximizer

 Lash Plumping Serum 

يقولو ( وظيفته حماية الرموش , يمنحها حجم مضاعف , يطيل ويكثف الرموش ) 

أنطباعي الأول 

زي مانتو شايفين هو لونه ابيض تستخدميه زي الماسكارا

حطيت منه وحسيت كأني حطيت ماسكرا نشف وطول رموشي ولفها هذا اهم شي عندي انو يلف الرموش 

خلى منظرها حلو بس طبعا مافيه سواد بس لوك طبيعي حلو 

لما نشف حطيت فوقه الماسكارا السوده واستخدمت ماسكرا ديور الجديده It-lash 

في البدايه لقيت صعوبه شويه لانها نشفت واتماسكت الشعرات ببعض

أخذ مني وقت بس لما خلصت النتيجه كانت تستاهل هذا الوقت

مره حبيته صار كأني دمجت ماسكرتين مع بعض وهذا الشي تقريبا كلنا نسويه 

اعتقد انو هذا الخيار الأفضل لرموشنا بدل دمج ماسكرتين ونضر الرموش 

عالأقل نحط واحد منهم سيروم حمايه والثاني ماسكرتك اللي تستخدميها

وبجد والله النتيجه كأنها ماسكرتين مع بعض طول وكثافه 

خذوها مني يستاهل تشتريه 

Glow Maximizer

يقولو ( يضيئ البشرة العاديه ويحدد ملامح الوجه حالا , يمكن أستخدامه فوق كريم الأساس 

لتحديد أماكن انعكاس الضوء ) 

أنطباعي الأول 

جدا حبيت العبوه نفسها لانها من جوه فيها بمب مره أنبسطت عشان تقدري تتحكمي بالكميه اللي تحتاجيها 

ملمسه كريمي فيه لمعه واضحه كأنه أضاءه سايله
مره ماتخيلت اني احط اللمعه دي كلها بوجهي بس قلت اسوي زي مايقولو اول بعدين اتفتك اذا ماحبيته
نظفت وجهي كويس بالكلاراسونك رطبت وجهي ووزعت البرايمر على وجهي
صراحه كان وجهي مره يلمع هههههه ولوهله جيت بمسحه
بس قلت اشوف كيف بعد الفاونديشن
حطيت الفاونديشن وكان فاونديشن شانيل خففيف وطبيعي
راحت اللمعه واتغطت بالفاونديشن
حسيت النتيجه عاديه بالبدايه مافيه لمعه
خرجت وبعد ثلاث ساعات اشوف وجهي وكيف صار الفاونديشن
حسيت بشرتي طبيعيه وفيها نضاره حلوه
ونفس الشي بعد 8 ساعات تقريبا
ماكان فيه خطوط حدود الانف والدقن
حبيت البرايمر وبساطته ونتيحته الطبيعيه
بس لو كنتي تبغي الأضاءه اللي فيه اخلطيه مع الفاونديشن
او حطيه فوق الميك اب على اماكن الأضاءه الوجنتين والانف والدقن
حيكون واضح اكثر 

Pore Minimizer

يقولو ( برايمر لبشرة نقية , خاليه من الشوائب , يزيل المسام 

ينعم , يوحد ويزيل عيوب الوجه في لحظه , يمكن أستخدامه خلال النهار لتعديل المكياج ) 

أنطباعي الأول 

زي ماقلت لكم هو من جوه بمب 

فأول 4 او 5 ضغطات نزلي زيت خفيف زي المويا صدمني بعدين اكتشفت اني مارجيت العلبه هههههه 

المهم ريحته شي مو طبيعي الريحه مره حبيتها 

ملمسه كريمي خفيف حلو 

لكن أول ماتوزعيه على وجهك يصير كأنه بودره وبجد يخفي المسام ويوحد لون الوجه 

يعني لما حطيته لوهله فكرت اني احط بلاش وماسكرا واخرج هههههه بس قلت بشوف كيف مع الفاونديشن 

منجد يوحد اللون ويصير ملمس وجهك مخملي مات 

يعني بيرفكت للبشرات الدهنيه 

البرايمر عجبني لكن فيه نقطه مهم جدا انكم تعرفوها 

لازم لازم لازم تعملي سكراب لوجهك قبل البرايمر هذا 

لانه طلعلي قشور بأنفي وانا ماكنت شايفتها من قبل 

صدمني يعني البنات اللي بشراتهم جافه او فيها قشور وحبوب اتوقع انو مارح ينفع لهم لانه بيظهرها اكثر 

مع الفاونديشن مره طلع بيرفكت  ومات ومخملي وتمام

اول 3 ساعات تقريبا بعدين بديت احس منطقة التي زون رجعت دهنيه 

يقولو تقدرو تستخدموه لتعديل المكياج خلال النهار مادري كيف ممكن نستخدمه بس بجربه بهده الطريقه كمان 

Skinflash

يقولو ( قلم سحري لتشرقي , يصحح ويحدد أضيفي أشراقه لوجهك وأمنحيه لمعان مذهل على المناطق الخمس الرئيسية للوجه 

طرف الدقن , جسر الأنف , الجبين , الوجنتين , جناحي الأنف )

أنطباعي الأول
انا مو من الناس اللي اعمل خطوط الكونتور والهايلايتر وما احب اثقل بالميك اب
استخدمته مصحح
كيف يعني
يعني بعد مارسمت حواجبي حددتها بسكن فلاش ودمجتها مع الفاونديشن .. نظفت الحواجب وحددتها اكثر

لما تحطي روج غامق ووتمسحيه يبقى اثر منه اوقات تقدري تعدليها بسكن فلاش
البنات اللي يكبرو شفايفهم برضو تقدري تصححي الأطراف فيه
حبيت هذه النتيجه
بس حسيته عادي زي اغلب الهايلايترز  المنتشره
انا مجربه من قبل حق ماك وكان جدا رائع اللي هو prep and prime

جريت حق سان لوران كان عادي
ديور برضو اعتبره عادي 

هذا كل شي 

محد طلع عينه من ذا البوست هههههه 

بس أتمنى اكون وضحت لكم كل منتج وأستخداماته 

وبسسسسس

أشوفكم في البوست الجاي بأذن الله