P. F. chang's مطعم بي اف تشانغز

مسسسسسسسسسسسساء الخيرات 

اليوم تقرير عن زيارتنا لمطعم

p. f. chang's

بي اف تشانغز وتشيز كيك فاكتوري وشيك شاك وايهوب وتكساس

كلها مطاعم فتحت الاسبوع اللي فات في التحليه بجده

كلهااا ماكانت متوفره بالسعوديه 

وطبعا الغالبيه يعرفها من دبي 

فكان فيه حماااااس مره كبير لما فتحت هذه الفروع هنا 

ومازالت الزحمه موجوده بالمنطقه كلهااااا

أصعب بوستات أسويها هي بوستات المطاعم ههههههه 

مره صعب تصوري قدام الناس لان  كثير يتضايق ويحسب اني قاعده اصوره 

أقعد طول الوقت أزبط الأعدادات بدون فلاش خخخخ معاناه بس تستاهلو التعب 

المطعم مررررررره حبيت ديكوراته كلها خشب وأضاءات شي جميل 

حسيته كبير بس ماشاء الله مع الزحمه يبان صغير 

طلباتنا والحمدلله  كانت موفقه لأننا استعنا بصديق زوجي أنسان متذوق للاكل والمطاعم 

أول طلب أكيييييد داينميت شريمب 

اي شخص يروح لبي اف تشانغز لازم يكون هذا الطبق من ضمن طلباته لانه أشهر شي بالمطعم 

Dynamit Shrimp 

سعره 55 ريال 

راااااااااااااائع ماكنت قادره اوقف اكل هههههه بس خفت اشبع قبل مايجي بقية الطلب 

كميته جميله جدا تكفي شخصين 

طبعا هو موجود بمطاعم كثير بس صراحه كذا مره اجربه وابدا مايعجبني 

يعني يعتبر اطعم داينمت شريمب قيد ذقته 

تقيمي 10/10 

ثاني طبق هو شوربه الدجاج بالنودلز 

 chicken noodle soup

سعره 45 ريال 

يجي في زبديه شوربه كبيييييره 

والويتر يوزعها في زبادي صغار 

حسيت أني في مسلسل كوري ولا راننغ مان وانا اكل منه هههههههه 

من زمان لما كنت اشوفه في مسلسلاتهم كنت احسه لزيز ونفسي اذوقه 

وبجد كان لزيز ومره 

سهل بالاكل حتى النودلز مره طريه 

تقيمي 6/10 

يمكن لو رحت ثاني ما اطلبه 

انا كان عندي فضول وطلبته لان كان ودي اجربه بس خخخخ

ثالث طلب 

هو

mongo beef

لحم منغولي 

سعره 85 ريال 

ثاني اشهر طبق عندهم 

مره مره مره عجببببببني يغلب عليه طعم الصويا صوص 

طري ولزززززيززز 

يجي معاه رز ابيض 

تقيمي 9/10 

واكيد لو رحت ثاني بطلبه 

الطبق الرابع والأخير 

 lo mein noodles

نودلز لو مين 

سعره 52 ريال 

يجي بالخضار

وتقدري تطلبيه بالدجاج وتزيدي 10 ريال 

أو تطلبيه باللحم وتزيدي كمان .. الخ

طعمها خورافي صراحه 

 حسيت فيه طعم شي مدخن 

وانا اعشق الأكلات المدخنه 

تقيمي لها 10 /10 

واكيدر لو رجعت بطلبها اول شي 

الحلا العجيب 

pf changs banana spring rolls

pf changs banana spring rolls

سعره 35 ريال 

سبرنغ رولز الموز 

واضح التركيبه من الاسم 

موز مغلف بسبرنغ روووول ومقلي 

ويتقدم مع الفانيلا ايسكريم وقطع من الفراوله 

ما أقولكم قد ايش استمتعنا فيه 

بجد مرررررررره لزيز

 وطريقته كمان سهله ممكن تتنفذ

وبسويها قريب بأذن الله لان بناتي مره عجبتهم 

تقيمي 10/10 

الخدمه _ ممتازه ماشاء الله الويترز كأنهم خليه نحل بالمطعم 

المكان _ ممكن بعض الناس يتضايقو لان مافيه بارتشن 

بس فيه جلسات كبيره تكون منفصله وتقدري تاخذي راحتك شويه 

الأسعار_ ممتازه وأشوفه ارخص من بعض المطاعم الموجوده 

الكميه _ اكثر شي حبيته الكميه 

مره كبيره

 ولاحظت لما كنا ننتظر انو كل الناس كانو خارجين بتيك أواي 

يعني الكميه للطبق الواحد بتكفي تقريبا 3 اشخاص 

حبيت أذكركم انو لما يزيد أكل 

خذيه وأعطيه لاي عامل في الشارع 

أو اذا عندك شغاله خذيلها من أكلكم 

أو زي حالتي اخليه غدا اليوم الثاني هههههه مرحبا بالكسل 

بس في الأخير 

مرررررررررره انصحكم تجربو المطعم لو كنتي في جده أو زائره بجد لاتفوتيه 

هذه كانت تجربتنا وأطباقنا في مطعم 

p. f. chang's

أن شاء الله اكون حمستكم بأنتظار ارائكم وتجاربكم معاه 

وأشوفكم في البوست الجاي بأذن الله 

KHLOOD