back to school تهيئة العودة للدراسة

hi girrrrrls

كيفكم وكيف استعدادكم للمدارس 

كلو تمام ؟؟

حتكلم معاكم عن سته نقاط مهمه في استعداداتك
نفسيتك
مشترياتك
عنايتك
مكياجك
اغراض شنطتك
وشعرك

 المدارس والحر والشمس ممكن تاثر على بشرتك 

او نفسيتك 

اول شي نتكلم على الصداقات 

اذا كنتي دوبك جديده عالجامعه او المدرسه 

اول شي بتكوني خايفه منه كيف اكون صداقه اهم شي

خليكم بشوشين دااايما  انتبهو تصيرو من النوع المعصب او المتكبر اوالمتذمر 

هذه الثلاث اشياء ممكن تدمرك ومحد بيقرب منك او بيطلب صداقتك 

ثانيا 

خليكم متعاونات ساعدي غيرك دايم اعرضي مساعدتك 

حتكوني قريبه من القلب ودايم المتعاونات هم اللي يكونو صداقات اكثر 

اي شي تحبيه لنفسك حبيه لغيرك 

بس خلي لك شخصيتك

 لان بعض البنات الله يهديهم يصيرو استغلاليات

افتكر انا وصاحبتي في الكليه كنا نساعد البنات بس صديقتي بداو يستغلوها وماتقدر تقول لا وربي الين الاختبارات النهائيه وهي كانت تساعدهم وترسم لهم وتسيب شغلها 

اللي بوصل له 

ساعدي غيرك لكن لاتعملي شغلها لاتحلي واجبها او عملها 

علميها الطريقه وخليها هي تنفذ 

كل يوم من الصباح الواحد يكون محبط شوي وماله نفس يقوم وماله نفس يرفع راسه من المخده 

كل يوم حطي لك هدف واسعي بكل طاقتك انك تنفذيه 

دلعي نفسك 

قومي بدري اعملي فطورك بطريقه انتي تحبيها 

اشربي كوفي سوي لك جو يفتح النفس 

لاتاخري نومك الى اخر دقايق وتقومي متقروشه ومتصربعه ومعصبه 

هدا كلو ياثر على نفسيتك 

------

نجي للبارت التاني من الاستعدادت 

حيكون للمشتريات 

كل المشتريات معروفه 

بس لو كنتي جديده عالجامعه فيه كم شغله تحتاجيها 

اولها 

نظاره 

شوز مرره مريح لانك حتمشي كثير 

واقترح عليك 

تومس او سكيتشرز روعه ومريحين جدا للمشي الكثير 

ساعه 

باك باق او شولدر باق

بنات 

حاولو تبعدو عن الكريستالات في الساعات والشنط 

لانو ابدا مو لوك جامعه انتبهو 

------------------

نجي للبارت الثالث 

العنايه 

اول شي قبل ماتنامي خدي شاور جميل وقشري ورطبي جسمك كويس 

حطي لشفايفك مرطب  

ويدك ورجلك كريم 

 وتصبحي على خيرررر 

( اللي بشرتهم جافه انصحهم يستخدمو  كريمات سوب اند غلوري او لوكستيان )

اول ماتقومي 

اغسلي وجهك بالغسول المناسب لبشرتك 

انا استخدم كلين اند كلير اويل فري مره مناسبني وعاجبني  للبشره الدهنيه واتكلمت عنه كثير 

بعدها رطبي وجهك باي مرطب انت مرتاحه له 

اضغطي هنا هدا البوست مره حيفيدك 

لما ترجعي للبيت اول شي تعمليه تشيلي الميك اب بنات مره غلط تنامي فيه 

ممكن يكون خفيف وتتهاوني فيه لا لا لا على طول امسحيه 

وبعدها استخدمي تونر تنظيف للوجه 

انا استخدم هدول الشيئين 

مزيل الميك اب ومنظف الوجه باييوديرما 

وتونر تي تري واتر من لش 

تقدري تكتفي بالبايوديرما 

بالنسبه للبنات اللي نظرهم ضعيف الافضل تعملي عدسات
واللي العدسات متعبتهم مررره زيي انصحها بقوه تستخدم قطرات ريفرش بلس
مرره مره مريحه وغيرتلي فكرتي عن العدسات كنت اتكاسل البسها  بس مره ارتحت مع القطره وسعرها رخيص ب18 ريال
حطي نقطه عالعدسه قبل ماتلبسيها وخلاص باذن الله مارح تحرقك او تضايقك
وخلي معاك بالشنطه كمان احتياط

----------------------------

البارت الرابع 

حيكون عن الميك اب الخفيف المناسب للجامعه 

مو لحفله او سهره او عزومه مره انتبهو بنات خلوكم طبيعين لاتكونو اوفر لانو ابدا مو كلاس 

وصديقني بتصيري مسخرة الجامعه 

اي شي فيه شيمر او لمعه مره لااااا 

ارواج غامقه عودي بنفسجي مررررره لاااااااا 

حتى العطر 

فيه عطور قويه مره ماتناسب الا السهرات ابعدو عنها لانها تجيب غثيان مع صباح الله خير 

اكسسوارات اوفر وكريستالات بليز لا لا 

فاونديشن فاااااتح لااااا 

كونسيلرر فااااتح لااااااااااا

سموكي ايز لااااااا

نشوف مع بعض اللوك الطبيعي 

اوكي اول شي نبدا برول غارنيه للهالات السودا مررره ممتاز 

بعدو بي بي كريم 

ادا كانت بشرتك جافه تستخدمي البي بي اللي بالوسط 

ادا بشرتك دهنيه تستخدمي  البي بي اللي باليمين جنب الفرشه 

تمام 

وزعي البي بي 

وبعدها ثبتيه بالبودره 

حبيت لوك غامق شويه استخدمي بودره برونز مات طبعا بدون لمعه

 ومره انصحكم ببودره بودي شوب من مجموعه هاني برونز جميله جدا 

كدا خلصتي الفاونديشن تبعك 

ادا عندك حبوب او اثار تبغي تخفيها حطي كوريكتور ( مصحح للكونسيلر )  عليها قبل البي بي 

تاني شي مررره مهم تسويه 

هو حواجبك خليكي مهتمه فيها دايم 

لاترسميها رسمه قويه وحاده مررره لا بنات ماعاد ينفع 

بس عبي الفراغات بايشادو بني وبعدها رتبي بماسكرا الحواجب سواء لون بني او شفافه مو مشكله 

ما افضل الايشادو بس لو حابه ممكن تحطي بيس ايشادو خفيف ممكن بيج او ترابي فقط لاغير 

انسب رسمه عين هي الكات ايز 

مع ماسكرا وخلاص وضعك تمام 

بلاشر بينك او برونز خفيف 

وروج طبيعي لحمي بينك  بيتش مره انصحكم بارواج كلينك اللي بالصوره مناسبه للاستخدام اليومي وتعالج شفايفك ماتضرها باذن الله 

ولونها خفيفه وصباحي 

اضغطي هنا هذا البوست حيفيدك باذن الله 

-------------------------

البارت الخامس هو ايش تشيلي بشنطتك 

حسيت هده هي الاشياء الضروريه اليوميه 

مناديل 

عطر 

انتي باكتيريا 

روجك اللي استخدمتيه بهدا اليوم 

كريم يد 

مرطب شفايف 

والعلبه الفوشيه هي ورقات تسحب الدهون من الوجه 

دايم تطلع هذه الدهون مع الحر 

ماعليكي الا انك تسحبي ورقه وتضغطي على انفك واو جبهتك مكان الدهون وباذن الله تنحل المشكله 

------------------------------------

البارت السادس هو تسريحات خفيفه ممكن تسويها للجامعه او المدرسه 

وشوفو هذا الفيدييو بس فيه موسيقى بليز اقفلو الصوت 

اللهم بلغت 

هنا 

وبسسسسس 

كذا خلص البوست يارب يكون مفيد وبليز انتظر تعليقاتكم هنا او بالانستغرام 

اشوفكم بالبوست الجاي