My Dolce Gusto ♥ جهاز القهوه دولسي قوستو

 Dolce Gusto

جهاز القهوة من نسكافية

عوده بعد أنقطاع شوي طويل عن المدونة 

موضوع اليوم راااااايق جدا وكثير طلبو رأيي فيه فحبيت أنزله في بوست 

عشان أخذ راحتي وأعطيكم المعلومات الكافيه اللي تخليك تقرري 

بالذات انو الجهاز وصل عندنا بالسعودية ☺

في البداية بقولكم انه فيه أنواع من هذا الجهاز 

كلها تقدرو تتعرفو عليها في موقعهم الرسمي 

https://www.dolcegusto-me.com/ar/

أكثر وحده أرتحت لها وطلبتها هي ميلودي اوتوماتك

مميزاتها

- طعم القهوه راااااائع وهذا شي مو غريب على شركة نسكافية يعني لاتشيلو هم الطعم واللزازه ابدا 

- تانكي مويا بسسس سعته 1.3 لتر 

- تسخينها سررريع جدا وماياخذ وقت 

- حجمها رائع كجهاز قهوة منزلي 

- متنوووووعه بكبسولاتها ( كابوتشينو . موكا . اسبرسو . شاي . عصير . ايس موكا ..... الخ 

- تعمل حار وبارد

- سعرهااااا راااائع بمختلف الأنواع  تبدأ من 700 الى 1300 ) ريال . وانتو عارفين كيف اسعار اجهزة الكوفي مره غاليه 

- كان عيبها الوحيد أنها مو متوفره بالسعوديه 

بس الحمدلله وصللت وصارلها أسبوع تنباع في بندة اجهزه وكبسولات 

- ماتحتاج تنظيف  ( بشرح لكم في اخر البوست ) 

طريقتها

 تضغطي الزر بالبداية يكون  أحمر يسخن المويا ولما يصير أخضر نفس الصورة يعني أنطلقي وحطي كبسولتك

ترفعي اللسان وتخرجي درج الكبسولة 

على كل كبسوله فيه مؤشر للكمية اللي تحتاجيها 

طبعا تقدري تتحكمي فيها زي ماتبغي 

تنقصي وتزودي بس المسؤولية عليك لو ماطلع لزيز هههههههه 

انا احب اقلل كمية الحليب 

بالرول اللي بالوسط تحددي المؤشر زي ماهو محدد بالكبسوله 

وتضغطي الزر الأحمر للحار والزر الأزرق بارد أختاري اللي تبغيه والماكينه تكمل شغلها 

احلا لحظاتي وانا انتظر القهوه لان في ذا الوقت يتعبى  المكان بريحة كوفي كاني قاعده بكوفي شوب ♥

مافي ثواني الا كوبك جاهز للانطلاق 

وبالعاااافيه 

احب ادلعه بكريمة وفارمسيل  لبناتي مع الهوت شوكلت ♥

لما تختاري كبسوله وتبغيها بارد لاتتوقعو انها بتعمله بااارد لا بتعمله بحرارة الغرفة وانت تحطية في الثلاجه  أو حطي ثلج بالكوب 

نجي هنا لشرح التنظيف 

الشي الوحيد اللي يتنظف هو درج الكبسوله وتقدري تنظيفه بعد كذا استخدام 

ليه ؟؟ وين الحليب ؟؟

المشروبات اللي فيها حليب زي الشاي لاتيه والكابوتشينو والقهوه الفرنسيه 

في البوكس بيجكي كبسولات حليب وكبسولات قهوه 

انتي في البدايه تحطي كبسولة الحليب بنفس المؤشر اللي قلنا عليه 

وبعدين تخرجيها وتحطي كبسولة الكوفي بنفس الطريقة 

نتيجته جميله يجي طبقات برغوه  شي جمممميل كل مره تحسي يبغاله تصوير هههههههه 

وهذا الشي انا اشوفه من اقوى المميزات ان الجهاز مايحتاج تنظيف 

مو زي بقية الاجهزه  زي نيسبرسو فيه تانكي مويا وتانكي حليب وطبعا يبغاله تنظيف فوري 

تقدي كل فتره تشغلي الجهاز كأنك بتعملي كوفي 
بس بدون كبسولات حتخرج لك مويا عاديه  برضو تعتبر من طرق التنظيف حقتها 

النكهات
جربت كثيرررر بالفتره الأخيره 
نسكويك , شاي لاتيه , أمريكانو , أسبرسو كراميل , شاي مغربي 
كابوتشينو , قهوه فرنسية , شوكوتشينو , ايس كابوتشينو , كراميل لاتيه مكياتو 
كلههههم جربتهم 
بس عشقي بالفتره هذه واللي انصحكم فيها   
1-امريكانو . اسبريسو 
2-الكابوتشينو والقهوه الفرنسيه خياري الثاني 
شاي لاتيه لزيز تحسيه صباحي حق فطور
- الشاي المغربي ماحبيته 
- نسكويك حلو للاطفال  وجربته لزيز
- شوكو تشينو ( هوت شوكلت عادي ) حلو مع الاضافات زي المارشميلو والكريمه 
- بوندي كثير يقولو عليها قهوه تركيه بس ماحبيتها كثير 
- كمان كورتادو ( اسبريسو بالحليب ) جداا رائع 
- الآيس كابتشينو مره روعه بعد ماتبرديه ينافس حق ستاربكس صراحه 

كل فتره حعملكم ابدآيت عالنكهات 

وهذا كوبي الجميل للطلعات حسيت اني لازم ارزه بالبوست هههههههه لانه شي جميل وكيوت وكوب وحافظه وله غطا ورهيب وبينك هههههههه ( اخذته من الدانوب ☺ ) 

خلصت البووووووست اتمنى انو عجبكم واستفدتو منه 

اشوفكم قرررييب بأذن الله