NAKED palettes مقارنه بين باليتات نيكد الثلاثه ..

مساء الخير عالجميع 

مع الأخبار الحلوه بوصول ماركة اربن ديكاي للسعوديه 

تحديدا  سيفورا جده ( رد سي مول ) 

حبيت أفيدكم بتجربتي لباليتات نيكد 1 و2 و3

كل وحده لها خصائصها وملاحظاتها 

وكمان رأيي بقلوسات نيكيد الجديده 

فيه ناس كثير تشوف الألوان نفس بعض 

وباليت واحد يغنيك عن الباقي 

بس الشركه فكرتها ايش 

نيكد 1 ( للبرونزيات ) 

نيكيد 2 ( سموكي أيز )

نيكد 3 ( بينكيات وروز قولد )

كلامي دحين بيكون عام للباليتات الثلاث 

الحلو فيهم تقدري تعملي لوك صباحي فريش 

وتقدري كمان تعملي لوك مسائي للسهرات 

كل باليت فيه مرايه وفرشه 

الأسعار كانت بـ 52 دولار 

الأن رفعو الأسعار لـ 54 دولار

هذه صوره للجميع وواضح الفرق في الألوان 

ممكن تشوفو 1  و2  يشبهو بعض وصح 

فيه شبه بسيط في بعض الألوان 

لكن مو نفس اللون الدرجه تختلف يا أفتح أو اغمق 

الباليت الثالث مختلف اختلاف تااام بالألوان 

NAKED 1

 نبدأ بالباليت الاول 

اخذته من زماااااان اول مانزل 

كان يجي بعلبه بلاستيك ومعاه برايمر 

تكلمت عنه هنا  في مفضلاتي 

وللان احسه مست هااااف 

جودته رااااائعه وسعره روعه بالنسبه ل12 ايشادو عمليه 

الالوان تطلع معاك من اول مسحه حتى لو كانت فاتحه تطلع 

كرفته كرف مو صاحي للدوام بيرفكت للسهرات بيرفكت الذهبي الموجود فيه راااائع 

حاولت اختار لكم الألوان اللي حبيتها فيه بس صراحه طلعت استخدمها كلهاااا واحبها كلهااا 

اعطيه 10 /10 

السلبيات اللي فيه 

التعليب شمواه يتوسخ بسرعه المرايه صغيره والفرشه وحده بس مو زي 2 و3 من جهتين 

لا من جهه وحده وهي فرشة توزيع الأيشادو 

NAKED 2

زي ماقلنا 2 للبنات اللي يحبو يعملو السموكي أيز 

التعليب هنا اتحسن كثيرررر عن نيكد 1 

العلبه معدنيه تتحمل كرف 

المرايه كبيره 

الفرشه لها جهتين فرشه للأيشادو 

والثانيه للدمج 

يعني نقدر نقول انهم حسنو وطورو منتجهم للأفضل 

ابرز شي يميز نيكيد تو هو وجود اللون الأسود 

تحسو أغلب الدرجات رماديات وترابيات وفيه درجات فاتحه رائعه للصباح 

لما جربت نيكد 2 كنت متوقعته زي نيكد 1

بس صراحه اتفاجأت مو نفسه ابدا 

وحسيت بتغير في اللوك حقي لان كان لي فتره على نيكيد 1

حسيت الالوان رااائعه وتغيير والأسود هو ملك الباليت هذا 

أعطيه 10 / 10 

صراحه مالقيت فيه سلبيات الباليت جميل وعملي وتعليبه ممتاز وجودته عاليه 

NAKED 3

نيكيد ثري 

تعليبه شبيه في نيكد 2

بس اللون يجنن لونه وري على نود والكتابه روز قولد 

التعليب اسرني صراحه 

من جوا المرايه كبيره والفرشه بجهتين نفس فرشة نيكيد 2 

ألوان الأيشادوز كان عليها ختلاف في الأراء بشكل كبير ناس حبت البنكيات وناس ماعجبهم 

أنا كنت في صد ورد 

ماني عارفه عاجبني او لا 

لما صارلتي فرصه اشوفه قدامي واعمل سواتشات حبيته وقلت بشتريه 

بأول فرصه لي اشتريته 

قعدت شهرر كل يوم احط منه عشان اتأكد من رأيي اللي بقوله لكم 

للأسف الباليت ماحبيته :(

اسرررع شي لاحظته مع استمراري في استخدامه هو ان جودته متغيررره 

انا جربت 1 و2 يعني  اتوقعت الجوده تكون بيرفكت زيهم 

كنت استخدم اللون كذا مره واعيد عليه عشان يبان 

كثير قالو عشان ألوانه فاتحه ماتبان بسهوله 

لا المسأله مو الوان فاتحه وألوان غامقه 

نيكد1 ونيكد2 فيهم الوان فاتحه وراائعه تبان من اول مره 

نيكد 3 لا عيدي وعيدي وعيدي الين يبان 

اللون الروز قولد كان جدا مهم بالنسبه لي بس تأثيره ماحسيته بيقمنتد زي ذهبيات 1 و2 

نيكد 3 اذا بتشتريه لاااااااازم تستخدمي قبله برايمر عشان تطلع معاك الألوان 

أنا خذته للصباح وللدوام بس مو شي عملي اني احط برايمر كل صباح  

للامانه اعطيه 6 / 10 

من حسناته 

انو يجي معاه 4 عينات لأنواع البرايمر الي عندهم وهذا شي اسعدني لاني كنت بجرب البرايمرات الثانيه اللي عندهم ومره حببيت 

نوع اسمه EDEN

أنصح بنيكد 3 للبشرات الفااااااتحه جدا 

والغاااااامقه جدا 

بالذات الغامقه لان البنيكات والروز قولد والبرونزيات تطلع عليهم شي روعه 

من حسناته كمان انو الأيشادو مو مثبته بغراء 

يعني سهل عليكي انك تشيليها وتحطيها بباليت ثاني زي فكرة الـ Z palette

تكملت عنها هنا 

NAKED ULTRA NOURISHING LIPGLOSS

القلوسات الجديده من اربن ديكاي برضو من نفس لاين نيكد 

تعليبها يجنن 

أعتمدو الذهبي ودايم التعليب الذهبي يعطي فخامه 

سعرها 109 درهم من سيفورا دبي 

عندنا بجده ماعرف صراحه ( بكره اشوفلكم السعر بأذن الله ) 

أنا مو من محبين الليب قلوسز 

لكن بالفتره الاخيره مره صارت تلفتني وصرت ابغى احط منها بالذات انو مكياجي غالبا يكون مااات 

أخذت لونين بيسك 

واحد بينك Lovechild

والثاني نيود أسمه Nooner

قوامهم كريمي اللون جدا واضح من أول مره خفيف مايضايق وماتحسي بطبقه على شفايفك 

ريحته عاديه , وطعمه عادي ( نقطتين مهمه ليا ) كان لي تجارب  مع الليب قلوسز وكانت جدا معفنه بالذات قلوسات الدرق ستور

أنصحكم فيها ؟؟؟؟؟

 ايوا جربي واحد عالاقل وخذي لون نيود لانه يمشي مع كل الأرواج 

شي كمان أنصحكم تاخذوه من اربن ديكاي هو الفلاشد باليت 

جدا رائع اللون البرونز جميل 

وكمان البلاشر والهايلايتر 

وكمان انصحكم بالأقلام 

خلص البوست ويارب يفيد أي بنوته محتاره 

اذا حبيتوه لاتنسو تدعموني بمشاركة البوست مع صاحباتكم 

واتس اب , تويتر , فيس بوك , انستغرام , بينترست 

أشوفكم في البوست الجاي أن شا الله