Blue Ocean Restaurant مطعم بلو أوشن - جدة

من فتره مانزلت بوست ريفيو لمطعم 

لان أغلب مطاعم جده بدون بارتشن ومره صعب تصوري 

انتي تصوري الطبق والناس يحسبو تصوريهم هههههه ( مره يعني ) 

ماقدرت افوت بوست لهذا المطعم الجميل :) واخذت لي كم لقطه اشارككم فيها 

مطعم بلو اوشن في فقيه اكواريوم 

فيه جلسات خارجيه وجلسات داخليه 

مافيه بارتشن 

اسعاره متوسطه 

المنيو منوع بحري ايطالي برغرات ستيكات كلو موجود 

أول مادخلنا كانت الساعه ٤ ونص تقريبا 

اختي تقولي قبل الساعه ٤ يكون بوفيه مفتوح 

وبعد ٤ طلبات 

المهم قالنا داخلي ولا خارجي طبعا قلنا خارجي لاني جايه عشان الجلسات الجميله اللي عالبحر 

قالنا تنتظرو ساعه ونص ؟؟؟ :( 

قلنا طيب :( وكلي خوف اني اتحسف عالوقت اللي بيروح بالأنتظار 

جلسنا في مكان الأنتظار وبناتي مبسوطين عند حوض السمك 

مره طولنا مره مره مررررره طولنا لين بدأت اعصب 

ومنجد بعد ساعه ونص لقينا طاوله 

مايستفاد ( انو المطعم مره زحمه ترى ) :( 

ونحن رايحين للجسات الخارجيه 

لفتني المطبخ مفتوح وقزيت كم قزه كذا اشوف لابسين قلفزات ولا لا 

هههههه ابشركم كلهم لابسين والشغل شكلو نظيف ميه ميه 

حبيت المكان حسيته شرح 

منعش 

نادرا ماتكون فيه مطاعم تحسي فيها بالراحه 

وهذه الجلسات الخورافيه عالبحر 

حسيت الآنتظار كان لصالحنا لما جلسنا لقينا الشمس هاديه 

وبارده وفيه هواء لطيف

اتوقع لو دخلنا قبل كان انصقعنا حر 

لما تجلسي تعرفي انك بتكي

 ( تكي > تكوه > تكاية > الجلوس طويلا لغير الناطقين بالحجازية ) 

يعني جلسه جلسه 

مو زي جلسة  المطاعم 

عشان كذا اتاخرنا ساعه ونص . كل الناس اللي بره متكين لهم ساعات 

والله ومنظر البحر يخليك متنحه مره مره حبيت المكان والجلسات 

اعطيها ١٠ من ١٠ 

جا الويتر 

وطلبنا 

خلصنا طلب سالناه متى يخلص الآكل 

قال ١٥ دقيقه 

قلنا فقشها علينا 

ولا منجد بعد ١٥ دقيقه جا الاكل مره مره ماطول 

أول طلب كان فيليه سمك  ماتذكر لا الاسم ولا السعر 

بس مو لزيز صراحه 

فيتوتشيني كاجون لانغويني 

سعرها اعتقد ٦٠ الى ٧٠  ريال  << مدري 

مررررره لزيزه حبيتها ولازم تجربوها 

مشكلها مره دهنيه 

باخر الصحن كان فيه زيوت عجيبه 

برغر ميني ميز mini me's

سعره ٤٥ ريال 

هذا الشي مرررررره انصحكم فيه 

حبيته  خفيف ظريف ولزيز وطري 

سلطة باربكيو صوص بالدجاج 

سعرها اعتقد ٤٥ ريال 

عاديه 

وانا ديني ودين اللي يحطلي سلطه ويوزع كل نوع خضار بجنب 

ياخي اسمها سلطه خربطها شويه قبل ماتجيبها 

بلو اوشن 

سعره ١٩ ريال 

هذا الكوكتيل علامة الجوده بالمحل 

اذا رحتي وماطلبتيه مايعتبر انك جيتي هههههه 

امزح 

بس منجد مره لزيز اطلبوه 

طبعا خلصنا وتكينا وعالمغرب ، طلبت امريكانو 

ليتني ماطلبته هههه نسكافه ومويا 

المكان تحفه 

الخدمه كويسه 

الآكل فيه اشياء لزيزه وفيه اشياء ماتتأكل يعني اقري قبل ماتروحي ايش اكثر شي يمدحوه الناس 

الاسعار تستاهل 

كمية الأكل ممتازه 

برأيي المطعم يستاهل الزياره 

واكيد اكيد ان شاء الله اروح له ثاني ( مع اني سمعت انهم بيقفلو مشاريع فقيه

 :( قلبي معاه والله 

أفضل اماكن سياحيه بتتقفل ( الشلال ، فقيه اكواريوم ، منتجعات موفنبيك ، الودعه ) 

قهر 

المهم الحقوه قبل مايقفل 

واحس حيكون يوم جميل لكم ولأطفالكم اذا وديتوهم الآكواريوم بالبدايه بعدين رحتو تكيتو في بلو اوشن 

يوم جميل ولطيف 

كثرت كلام كأن المطعم حقي هههههه 

يبغالي نسبه والله 

يالله باي 

اشوفكم بالبوست الجاي إن شاء الله 

 :)