it FACTOR مجموعة ات فاكتور

مرحبا بنات 

ايش اخباركم علومكم ؟

ليه اسبوعين مانزلت بوستات :( 

مع أنو فيه عندي ريفيوهات كثير بس ماني لاقيه وقت أصور 

بحكيكم اليوم عن تجربتي مع منتجات 

it FACTOR 

يمكن شوفتو بلوقرز نزلو تجاربهم 

كل وحده لها رأيها وطبيعة الشعر تختلف من شخص لشخص 

حابه أوضح لك طبيعة شعري عشان تشوفي رأيي حيناسبك أو لا 

أنا شعري ناعم كان دهني 

وبعدين صبغت فصار شويه جاف .. 

طوله متوسط والصبغه سحب لون وانتو عارفين نتايج السحب كيف بتكون 

***

قبل ما أبدأ أبغى أشكر شركة دار الميسان  

لانهم أرسلولي المجموعه عشان أجربها وأقولكم رأيي 

وأكيد هذا الشي مارح يأثر في رأيي الشخصي 

بالعكس 

الحلو بقول حلو 

والبايخ بقول بايخ هههههههه

فكره منتجات it FACTOR 

تحتوي على تكنولوجيا جديده ( فيبور بووست ) طريقتها

تسرع لك عمليه تجفيف الشعر 

لانها تقلل التجاذب اللي يصير بين جزيئات الماء وساق الشعر 

اهم شي في المنتجات واللي خلاني بجد أتحمس اجربها هي انها خاليه من كلورايد الصوديوم 

تقريبا كل الشامبوهات اللي بالأسواق فيها كلوريد الصوديوم وهذا الشي له مضار كثير اهمها تساقط الشعر 

فحاولي قبل ماتاخذي أي شامبو تتأكدي من محتوياته خلف العلبه 

بالنسبه للشامبو 

تحسيه كانه جل لونه شفاف ثقيل 

يرغوي بس بشكل اقل من الشامبوهات الثانيه وهذا الشي ماضايقني عادي 

لكن فيه رغوه نقول عليها متوسطه 

ريحته مره حلوه ريحة حمضيات فواكه تروبيكال شي زي كذا 

مره عجبني الشامبو لاني من بعد ماصبغت وانا كل شويه أغير ما أستقريت على شي 

حبيت فيه انو ينعم الشعر من وقت ماتغسليه تحسي كانك حطيتي بلسم بس هو مافيه بلسم 

البلسم 

 ملمسه كريمي 

فعاااااال جدا جدا انتو عارفين أني اعشق البلاسم 

واي وحده مسويه سحب لون تعشقهم لانهم يرحموها من تشابك الشعر الفضيع اللي يصير بعد الشاور 

قبل قلت لكم جربت امريكان دريم من لاش وماعجبني لان نتيجته جدا خفيفه اخرج من الشاور ماكاني حاطه بلسم واتصارع مع شعري 

لكن بلسم ات فاكتور راااااائع تقريبا اكثر شي حبيته في المجموعه 

وحسيت نتيجته تستمر لأستحمامين 

يعني كنت أستخدمه لشاور والشاور الثاني لا وهكذا .. 

ريحته نفس ريحة الشامبو لان المجموعه كلها ريحه وحده 

الكريم 

أستخدمه بعد الشاور والشعر مبلل ماحب أحط كثير لا 

مرررره شويه 

مره نااااعم حتى في ملمسه 

الفتره الأخيره صرت أستخدمه لبنتي وبجد يهجد الشعر بدون مايدهنه 

طيب أيش لاحظت في التجفيف ؟؟

اذا كان شعري مبلل وسبته مالاحظت انه يجف اسرع عادي زي دايم 

لكن لما اجففه بالأستشوار ايوا يجف بسرعه وماياخد وقت 

مره ساعدني في الصباح لاني احب اخذ شاور قبل ما أخرج 

واجففه سريع سريع بالأستشوار والنتيجه جميله 

هل برجع أشتريهم ؟؟ 

ايوا طبعا 

بالذات الشامبو والبلسم جدا ناسبوني 

وفرحت انو صارو متوفرين في جده زي ماقريت في مشغل كلود ماكسيم ومنه سنتر 

لكن اذا ماكنت موجوده في جده وحابه تجربي المجموعه 

أتواصلي مع شركة دار الميسان

هذا أكاونتهم في الأنستغرام 

@daralmaysanco

أتمنى تكونو أستفدتو من البوست 

اشوفكم قريبا في بوست ثاني بأذن الله 

khlood