آناقة elegant 1

مع هرجة العيد امس بالأنستغرام 

جاني حماس من صباح الله 

مسكت اللاب توب 

وقررت اكتب واكتب كل اللي بخاطري 

يمكن بنوتة تقرأ كلامي وتبدأ صح 

يمكن كلامي يأثر بطريقة إيجابية لوحدة منكم 

عارفة كثير يطلبو مني الموضات الدارجة بسنة ٢٠١٥ 

وهذا جاي بالطريق إن شاء الله بس بالأول 

اقرو هذا البوست 

و تعالو نتناقش 

فيه بنات كثير متأكدة انهم لسه ماعرفو لذوقهم

منجد

 كيف اشتري وكيف بيطلع عليا وايش اللي يناسبني

وايش اللي مايناسبني وفعلا هذه أسئله تدور براس كل وحدة فينا

اليوم حابة اقولكم وجهة نظري 

فيه بنات قالولي يعجبنا ذوقك بالتنسيقات ويطالبو ببوستات تنسيقات 

اذا كنت حابة ذوقي 

أسمعيني 

الموضوع بقسمه على نقاط وبتكلم بكل نقطة ورأيي فيها وأيش اللي انا اشوفه صح 

مو شرط أنا وانتي نتفق 

أول نقطة 

انتي تحلي اللبس مو هو يحليك 

هذه اهم نقطة ولازم تستوعبيها كويس 

مجبرة انك تفهميها 

مارح اقولك جمالك الداخلي ومدري ايش هههههه لا خلاص شبعنا من ذا الكلام 

البوست اليوم عالشكل مو عالشخصية ولا على الأخلاق والأداب 

وصلت لقناعه انو اهتمامك بنفسك وبجسمك هو اللي بيحلي شكلك 

لو تلبسي خيشه 

حتقولولي كيف ؟ اقولكم 

اوقات اشوف بعض البنات ممكن تلبس لبس جدا بسيط ، فستان ساده لا موديل ولا لون ولا شي 

عادي جدا ، واوقات تلبس فستان بشع 

بس ما شاء الله كلهم ينطقو عليها 

كيف كذا 

اقوم ادورر عالشي اللي منجد لفتني وعجبني بشكلها 

الاقي الجسم حلو ومرتب 

الشعر سواء مصبوغ او عاملته بشكل مرتب ويفي او كيرلي بس مزبطته 

لونها ماشاء الله بيرفكت 

جسمها فيه لمعة تفتح النفس 

ضحكتها << أسنانها 

بساطتها بالأكسسوايز 

 شغلها على نفسها وعلى جسمها هو سبب جمالها 

وبذكر لكم بالصور شخصيات انتو تعرفوها

أول جميلة هي ليدي فوزازا 

هي مصممه سعودية وجمالها عادي وفيه بنات كثير بالسعوديه بنفس مستوى جمالها وأجمل 

فوزازا اصلا تصمم بليزرات حلوة تعجبني تصاميمها
  بس اتعمدت اجيب لها صوره بملابس عاديه عشان تشوفو 

كيف اهتمامها بنفسها ابرز هذه القطع 

ايش اللي جملها  ماشاء الله

الجسم ، الشعر ، اللون ، البشرة 

صح ولا لا ؟ 

هذه كلها متعوب عليها ، ماتجي كذا بسهوله 

لازم تعرفي لنفسك وتشتغلي على نفسك 

صح فيه بنات جميلات خلقه من ربنا بس اهمالها لنفسها بشعها 

وبنات عاديات وملامحهم عاديه بس مع الأهتمام يطلعو جدا جميلات وملفتين 

في هذا الزمن 

الجمال مو مهم 

الأهتمام هو المهم والضروري جدا جدا جدا 

وترى منجد والله فيه سعوديات اجمل من كذا بكثيرررر ومنجد عارفين لنفسهم 

والبعض الآخر للاسف ماعرفو لنفسهم 

الشخصية الثانية مين تتوقعوها 

بيبي عبد المحسن 

شوفو اتعمدت اجيب لكم خليجيات مننا وفينا عشان ماحد يتعذر 

بيبي عبد المحسن شخصية انستغرامية مشهوره جدا 

جمالها جدا عادي 

وبنات كثير زيها 

بس ما شاء الله عليها اشتغلت على نفسها صح 

كان فيه لها صوره وهي صغيره واضح انها صغيره وللأسف انتشرت الصوره وجلسو يقولو شوفو العمليات 

البنت منجد مو عامله عمليات بس عرفت لنفسها وهي بنفسها قالت ايش سوت 

اول شغله نحفت 

صلحت أسنانها 

اللي يتابعها بالسناب ماشاء الله يعرف بشرتها كيف بدون ميك اب 

بشرتها صافية ماشاء الله وهي بنفسها تقول انها تعمل جلسات نضاره وفيلر 

وجد واضح وجهها طبيعي ، مو وجه عمليات 

لون شعرها ، لون بشرتها ، ماشاء الله خلانا نشوفها جممميله وتحلي الملابس 

احس اني طولت وأنا بنقطة وحدة بس هههههههه شكلو نخلي البوست أجزاء احسن 

الخلاصه 

مو الملابس اللي تحليك 

انت اللي تحليها 

كيف تصيري تريندي بآناقة مو بهلاقة 

الآن مع السوشال ميديا ومدونات الفاشن صار فيه شريحة كبيررررة من البنات 

عارفين الموضه وحافظينها 

حتى البنات الصغار صار ودهم يطبقو الموضة 

حلو ، تمام ، مافي مشكلة في هذا الشي

 بالعكس شي جميل نواكب التطور واللي نازل بالسوق 

فين المشكله 

لما تاخذي كل موضة نزلت وتنسيقها كلها مع بعض 

حاليا فيه موضة بكل شي 

بالتوبات وبالبناطيل وبالتنانير حتى بالمناكير ، وبالميك اب 

ايوا فيه موضات بالميك اب :) وبالصبغات 

بالأكسسوارات ، بالشنط بالشوزات 

فيه شريحة لازم تثبت لك بالقوه انها تعرف الموضة 

فتلاقيها مهوله بعمرها

مثلا

لابسه تنورة بنقشه 

مسوية اظافر نيل ارت او لون صارخ 

لابسه توب بحركه 

الروج يصرخ 

الحواجب تصرخ 

الأكسسوار يصرخ 

كل شي فيها يصرخ شوفوني شوفوني انا مسوية كل شي وعارفه كل شي 

غلط مو شي يفرح ومو شي حلو ، بالعكس شكلك صار مزعج للعين 

معد فيه أي اهتمام بأي شي تقوليه لأن وانتي تتكلمي عيوني الناس مشغولة 

تشوف انتي ايش مهوله بعمرك 

والله امس فكيت على قناه خليجية من زمان عن القنوات العربية 

لقيت مذيعة منجد مهولة بعمرها 

شعرها بوي + ميك اب عيون ثقيل + روج ثقيل + اكسسوارات كثيره + عدسات 

مناكير صارخه واساور وزحمه 

والله تنحت 

لو تسألوني دحين ايش كانت تقول ، مدري 

عن ايش تتكلم ، مدري والله 

اختاري شي واحد، اثنين بالكثير وطبقيهم مع ميك اب مرتب وشعر مزبوط 

وخلاص يكفي 

مثلا قلنا اول تنورة بنقشة 

خذي توب ساده ويفضل أبيض 

شوز سادة بدون حركات 

مناكير نود 

ممكن تحطي روج غامق مع رسمه عين بسيطه 

برضو بالميك اب حلو التوازن 

خليها قاعدة 

رسمة عين ثقيلة على طول روج بسيط ونود 

تبغي تحطي روج غامق او صارخ اكتفي ببرونز الوجه ورسمة الكات ايز للعين مع ماسكرا وحواجب طبيعية 

وخلاص يكفي 

انا ماتوقعت اني انفلت كذا ههههههه

بس جد تعبت واذا حبيتو البوست 

نكمل نقاشنا بالأجزاء الجاية 

قبل العيد وبلاوي العيد 

الله يبلغنا رمضان والعيد بخير وبفرح يارب