جهاز الليزر المنزلي من فيليبس Philips lumea

مساء الخير بنات 

كيفكم مع الأجازه إن شاء الله الاقي احد يقرأ البوست ههههههه لاتكونو نايمين 

موضوع اليوم عن جهاز الليزر المنزلي فيليبس 

خلاص جا الوقت اللي اكلمكم فيه عن تجربتي معاه وأن شاء الله البوست يكون مرجع لكل وحده محتاره 

أول شي بتكلم عنه 

من فين اشتريته وسعره وموديله 

أنا اخذته ب١٨٤٠ تقريبا من أمازون البريطاني 

والتوصيل كلف ١٥٠ ريال 

المهم سعره مره ممتاز 

 اللي هنابالصيدليات  كانت اسعارهم على ثلاثه الاف بس مره نزلت اسعارهم دحين

يعني اتوقع  وصلت لألفين وممكن أقل 

الموديل اللي عندي ٢٠٠٦

البوكس من جوه يجي كذا الجهاز  

وراسين واحد للوجه وواحد للجسم ( الموديل اللي بعده معاه ٣ رؤوس وجه وجسم وبكيني )

والشاحن وشنطة وكتالوج 

الراس الكبير للجسم حجمه حلو ويغطي مساحة كويسه 

كنت محتاره جهاز فيليبس ولا جهاز تريا لكن صراحه جهاز تريا مساحة الراس مره صغيره يعني شغل أكثر :( 

الجهاز فيه  ٥ درجات 

طبعا هما محددين في الكتالوج كل لون بشره ونوع الشعر له درجه معينه 

انا خوافه هههههه 

في البدايه التزمت بالدرجات اللي قالوها 

أول شهرين كنت احط على ثالث درجة 

كان فيه فرق بس جدا بسيط 

بعدين خلاص لما راح الخوف ووثقت فيه صرت ارفعها للأخير 

والنتايج صارت تطلع بشكل افضل 

كيف تستخدميه 

أول شي حطي ببالك بدأتي ليزر خلاص انسي الحلاوه أنسي البراون انسي كل شي مالك الا الموس 

لازم تكوني شايله جسمك بالموس وبعدين تبدأي فيه 

أنا قبل ما أشتري الجهاز قعدت شهرين أستخدم الموس عشان ابغى الشعر يطلع كااامل 

الجهاز جدا جدا جدا آمن يعني ماتخافي على الأطفال منه 

مارح يشتغل اذا ماكان مثبت عالجسم بشكل صح

وضع الجهاز لازم يصير نفس الصوره  

عاموديا عالمكان المحدد 

لما يكون وضعه  سليم 

تشتغل اللمبه الخضرا اللي ورا تقولك

ريدي  جاهز

تضغطي عالزر ويطلق الليزر 

أنصحك في البدايه تحددي الاماكن بقلم تحديد فاتح

لو أشتغلتي  بشكل عشوائي رح تتلخبطي ومايبين معاك فين انضرب بالليزر وفين لأ 

  بعدين لما يطلع شعر رح تشوفي أماكن فيه وأماكن لا تصير يدك مرقعه 

بالنسبه للوجه انا ما اعمل الا منطقة الشنب فقط 

ونفس الشي تشيلها بالموس حق الوجه  هذا 

أعرف انو يفجع تشيلي شنبك بالموس هههههههه 

بس مع الليزر رح تشوفي نتيجه حلوه 

في البدايه برضو كنت استخدم لشنبي درجه ٣ 

بس حسيت النتيجه بطيئه مره 

وصرت احطها لخمسه نفس الجسم وفعلا النتيجه حلووه 

نجي عند رأيي وأيش اللي لاحظته وهل انصح فيه ولا لأ 

أول ما أستخدمت الليزر كان في بالي لو خفت نسبة شعر الجسم بنسبة ٥٠٪  رح أكون جدا مبسوطه 

فعلا ماكان هامني انو مايصير فيه شعر 

لأ عادي بس المهم يخف 

بعد أستخدام الجهاز لسنه كامله أقدر اقول انو الشعر راح بنسبة ٦٠ ٪ في الميه 

ولو اهملتي شهرين بيبدأ يرجع 

الموضوع يبغاله أستمراااار وصبررر 

المفروض تعملي جلسه كل أسبوعين 

انا صراحه كنت كل شهر تقريبا 

وبعد ما خف الشعر بالآخير صرت كل شهرين تقريبا اعمل جلسه 

فيه نتايج طبعا 

لكن 

اذا رحتي عملتي الليزر في عياده يمكن تحصلي نتيجه افضل من ٣ زيارات بس 

أنصح مين 

البنات اللي ماعندهم ميزانية لليزر العيادات 

البنات اللي اصلا شعرهم قليل 

اللي ماتتوفر لها مواصلات للعيادات 

البنات اللي مسويين ليزر في عياده  ويحتاجو شي في البيت يعملو فيه رتوش 

هذا رأيي وأنا أكيد مكمله فيه لانه خلصني من ألم جهاز نزع الشعر والحلاوه والقرف ذا 

هذا ارحم بكثير منهم 

لكن خلاص ابغى شي أقوى وأسرع

ممكن اروح اعمل جلستين في عياده وارجع اكمل مع الجهاز 

أن شاء الله أفدتكم لو شويه 

وأكيد أبغى أسمع أرائكم تحت في الكومنتات 

أشوفكم على خير