Benefit cosmetic reviews .. مراجعة لميك اب بينفت

اليوم بنتكلم عن بينيفت وحيكون البوست مشطشط

فا من دحين اقولك لاتقارني كلامي بغيري 

مو شرط كلنا نكون نفس الرأي 

ولاتاخذك الحميه وتدافعي عن حاجه بس لانها عندك 

انا هنا وظيفتي اقولكم ملاحظاتي وانتو لكم الخيار تشترو ولا ماتشترو 

في الأنستغرام سألتكم عن اسعار المنتجات
لان المنتجات وصلتني هديه عشان اجربها


 the porefessional

في البدايه بتكلم عن برايمر ذا بورفيشنال

البرايمر هذا عندي منه 3 تقريبا ومجربته من زمان وكتبت عنه هنا بمفضلاتي 
اكتشفت انو فيه بنات يجربو كل شي بدون مايركزو هل هذا المنتج مخصص لهم او لا
برايمر بورفيشنال مخصص للبشره اللي فيها مسامات كبيره
وتبان حتى بالفاونديشن
ولان الفينش حقه مطفي مخملي يناسب البشرات الدهنيه كمان

وظيفته هي انو يسد المسامات ويخفيها
فلما تجي تحطيه على وجهك مو لازم توزعيه على الوجه كله
يكفي تحطي عالمناطق اللي فيها مسامات غالبا تكون عالأنف ومنطقة التي زون
البرايمر حلو ويستاهل التجربه
هل هو افضل برايمر .. لا
يناسب الكل ... لا
لازم تشتريه ... اذا كانت عندك مسامات كبيره ايوا
سعره اخذته 158 ريال
معقول السعر



big easy bb cream

بي بي كريم بيق ايزي
اللي حابه تعرف ايش يعني بي بي كريم تجي هنا 
صراحه من أجمل البي بيز اللي جربتهم
تغطيه متوسطه مناسب للبنات وللدوام خفيف مو ثقيل
فيه نسبه حمايه
مناسب للبشرات الدهنيه يعطي نهاية مطفيه للوجه كأنك حاطته بودره بس ماتحسي وجهك جاف لا طبعا مترطب
الدرجه اللي وصلتني فاتحه عليا شويه بس زبطتها بالبرونز
البيبي جمممميل وممكن ارجع اشتريه  ثاني بس درجه اغمق شويه
سعره قلتولي 189 ريال ( غالي صراحه )
بالدولار ومن الموقع 38 دولار

they're real! mascara

ماسكرا ذير ريل
ماسكرا خفيفه . بالنسبه لي اشوفها عاااديه جدا جدا
رموشك خفيفه .. ماتناسبك
الماسكرا ماتعطي فوليوم . ماتكثف الرموش
للأمانه ابدا ماعجبتني كان عندي عينه وبرضو ماعجبتني قلتو لا السايز الكبير غير
اهو جاني السايز الكبير وبرضو نفس النتيجه
ماسكرا صباحيه فقط
حتى الفرشه حقها مرره حاده لو غلطتي وجات على عينك الله يستر
صراحه ما انصح فيها
سعرها 132 ريال
تأثيرها نفس تاثير ماسكرات الدرق ستور فعشان كذا برضو اشوف السعر اوفر عالمنتج ونتيجته

they're real! push-up liner

أوكي وصلنا للمنتج اللي الكل حاب يجربه
واللي للأسف ماني عارفه اقولكم رأيي فيه كويس
بقولكم ملاحظاتي وانتو براحتكم

 ذير ريل بوش اب لاينر هو جيل لاينر بس قلم
الراس ربر بنفس شكل الفرشه المشطوفه ويخرج الجيل لاينر من الوسط
سواده .. ممتاز
ثباته .. جدا جدا ثابت ( لدرجة مستفزه وبقولكم ليه )
طيب
انا الحمدلله اعرف للجيل لاينر مررره كويس بالفرشه وماشيه اموري عال العال
ففلما جيت اجربه حسيت اني ماعرف ولا شي وفجأه كل عين مختلفه
اتدربت عليه كثير ايام عين تمام والعين الثانيه شكل ثاني
هما يقولو انو مناسب للمبتدئات بصراحه احس مره لا مايناسب المبتدئات ليش
اذا غلطتي بشي بسيط صعب جدا انك تعدلي الغلط
مره كنت مستعجله وسوت الايشدو وكل شي باقي خط الأيلانر وامشي
غلط بشي بسيط جيت بعدله ماقدرت اضطريت امسح العين كامله وارجع اعيد كل شي من جديد
 جدا جدا اتنرفزت من الثبات  عشان كذا اقولكم اوقات الثبات القوي يكون مستفز

من عيوب التعليب بدايه كل استخدام لازم تشيلي الجزء اللي بالبدايه لانه يكون ناشف ومكلكع
فيه كمان مشكله لما تلفي من تحت ويطلع معاك المنتج
اول ماتجي تحطيها على عينك يخرج كله ويصير كتله وبعدين انتي تسحبيها وترسمي شوفو الصوره اللي تحت

شايفين الصوره اللي تحت عاليمين زي كذا بالزبط
اماكن فيه واماكن لا
انتي زبطي نفسك وقتها
سعر الأيلانر 140 ريال

خلو معاه ريموفر ( مزيل ) خاص له
هذه انا اعتبرها من عيوب المنتج ( مو عملي ما تقدري تستخدمي المزيل اللي عندك )
لان جد جد لازم المزيل  حقه
والمزيل كمان فيه عيوب
نوعه كريمي .. مشكلته لما تجي تمسحي الأيلانر مايمسح بنظافه لا من النوع اللي يحوس العين ويخليها كلها اسود
فهمتوني .. زي كذا


يعني لو غلطتي وجيتي تمسحيه بالمزيل حقه
كل شي سويتيه ايشادو اضاءه كلو حينعدم بالمزيل
سعر المزيل 100
جربت امسحه بالبايوديرما
يتمسح بس لازم تحكي بقوه مايروح بالساهل

احس ضروري المزيل حقه
وكذا يعتبر السعر 240 ريال الأيلانر والمزيل حقه
:(
انا اقول اشتري فرشه مشطوفه واتعلمي عليها افضل وأوفر بكثير
وجربو جيلاينر انجلوت جدا رااائع وب80 ريال بأذن الله حسويله ريفيو  قريب



تعبت والله هههههههه

يالله نكمل

Gimme Brow Gel

ماسكارا الحواجب
 اللون اللي عندي ميديم ديب
حسيت البني مايل عالرمادي شويه
عادي واقل من عادي
حجمه مرررره صغير بالزبط قد الأصبع
حطيته كذا مره ماحسيت اني حاطه شي
سعره من الموقع حقهم 22 دولار يعني تقريبا 85 ريال
لكن بكم يبيعوه عندنا مدري  ..
لما سألتكم قلتو 150 ريال :( جد صدمتوني اذا كان صح 150 ريال
مره لاتشتريته مايستاهل

"that gal"

برايمر ذات قال
من البرايمرات اللي حبيتهااااا
لانه خفيف ووظيفته يعطيكي قلو ولوك صحي
خفيف وتعليبه حلو ومريح
احطه قبل الفاونديشن سهل بالتوزيع ويخلي وجهك صحي
حبيته
سعره 150 ريال
احسه يناسب البشرات الصاااافيه حتبان نتايجه عليهم بسهوله

chachabalm-lollibalm

مرطبات التنت
تعرفو التنت اللي طلع من بينفيت
لولي تنت وبيني تنت
طلعو منهم المرطبات هذه
اللي عندي تشا تشا بالم ولولي بالم
تعليبهم مره جميل ترطيبهم خفيف الى متوسط
فيه لون بسييييط يطلع معاك
ثباته متوسط كمان يعني ممكن يقعد معاك 4 ساعات الترطيب
سعرهم الواحد ب 103 ريال
يستاهل .. :/ لا لانه مرطب عادي مو معالج لشفايفك

high beam

أضاءه الهاي بيم
أضاءه كريميه سايله صدفيه بينكيه تأثيرها مررره حلو
يمكن انا احب الأضاءات الذهبيه والبرونزيه اكثر
بس هذه بجد جميله والحلو فيها ممكن تخلطيها مع الفاونديشن وحتعطيكي قلو حلو لوجهك
ماحبيت التعليب حقها جاي كأنه مناكير من جوه فرشه
حسيت لو كان فيه بمب او نفس تعليب برايمر ذات قال حيكون افضل
سعرها 136 ريال
مناسب ومعقول




____________


طيب في النهايه بقولكم رأيي الشخصي 
بينفيت مبالغ في الأسعار مقابل جودة المنتج 
يعني فيه اهتمام واضح بالشكل والتعليب 
فيه اهتمام بالابتكار والأختراع 
وفيه اهتمام بالتسويق 
واحب فيهم هذا الشغله انهم دايم يسوو اشياء جديده تجذب البنات لهم 
لكن لو جينا نحلل المنتج ماحسه يستاهل هذا السعر 
بينفت بالنسبه لي تعتبر بمكانه ماك واقل 
ما اعتبرها هاي اند براند 
اعرف انو كثير منكم يختلف معايا 
بس انا هنا اكتب لكم رأيي بصراحه وأمانه 
وكان لازم اقول ذي الكلمتين لان اعرف فيه بنات نفسهم يشترو مكياجات بس الميزانيه ماتسمح 
وفيه بنوتات صغار يجمعو من مصروفهم عشان يدلعو نفسهم فحرام يدفعو ذي المبالغ على جوده اقل 

اذا كنتي مره حابه تجربيهم 
بينفت عندهم بوكسات عينات 
هذه حلوه وتقدري تجربي كذا منتج وتشوفي يناسبك او لا قبل ماتشتري السايز الكبير 

بالأخير انا كتبت لكم كل منتج يناسب مين وانتو لكم حريه الأختيار 

اشوفكم في البوست الجاي بأذن الله