bye bye 2014 باي باي ٢٠١٤

٢٠١٤ 

كانت مليااااااانه تجارب ههههه 

فيه تجارب ذكرتها لكم وفيه تجارب كانت مبهمه ماتكلمت عنها كثير 

اليوم بقولكم كل شي مريت فيه في هذه السنة بحلوها ومرها 

كل سنه اقعد الوم نفسي ليش ماعملتي شي ماقدمتي على مدارس 

ماسويتي شي 

في بداية السنه حمست نفسي وقدمت على مدرسه خاصه بس كنت متدربه 

هم مايوظفو بدون خبره وانا من نفسي قلت ابغى اتدرب عشان اتعرف اكثر عالتغيرات اللي صارت بالتعليم 

بالذات انو الان مررررره مختلف عن تعليمنا وطريقته 

انا تخصصي تربيه فنيه 

وكنت حابه ادرس تمهيدي ، ابتدائي شي خفيف يعني ببدايتي 

اللي صدمني اني اول مارحت فرحو فيا مره هههههه 

وطلع عندهم احتياج عااااجل للثانوي 

المشرفه اعطتني المنهج وقالتلي شوفيه تقدري تعطيه ولا لا ؟ 

اخذته البيت وشفته 

المنهج صدمه 

كأنه دراستي في الكليه 

واللي صدمني اكثر انو كلو نظري :( 

يادوب كم درس اللي عملي 

المنهج كان مقررات 

الصدمه الآكبر انو كان لازم اعملهم اختبارات نظريه وشفهيه 

واوراق عمل وملفات انجاز وشغلات كثير سخيفه برأيي انو التربيه الفنيه ابدا ابدا مو كذا 

كنت ابغي البنات يدخلو عندي ينبسطو ويغيرو جو المناهج الثانيه عندي 

انصدمت انو التربيه الفنيه صارت نفس المناهج الثانيه كلها اختبارات وقرف 

بتقولو ليه ايش فيها التربيه الفنيه شي نظري ،، بقولكم فيها بلاوي متلتله 

المدارس التشكليه والفنانين الاوربيين وحياتهم ونقد النقاد والصحفيين للوحات 

مقارنات للوحات تغيير الفن علي مدى العصور بلاوي بلاوي متلتله مو الكل يعرفها 

المهم قلت الكبير يبدأ كبير هههههههه >> ترقع لنفسها 

قررت اني اعطيهم المنهج وكان عقدي ساعات كان حصه وحده بس باليوم وكنت اقدر ارجع للبيت بدري حسب عقد الساعات اعطي حصتي وامشي 

بس انا فضلت اقعد لنهاية الدوام واستفيد من غيري 

استفدت كثيرررر صراحه . ،انبسطت مع بنات الثانوي كانو كبار وعاقلين ياخدو ويعطو 

مو زي المتوسط مجانين 

حبيت التجربه بس كمان عرفت اني ماحبيت التدريس كثير وصراحه ماحبيت مجتمع المعلمات ابدا 

اكيد مو الكل زي بعض بس مجتمع كله نميمه وحده تدخل يتهرجو معاها عادي ولما تخرج يحشوها 

:(

 وقررت اني مابغى خلاص مابغى هههههه 

خلص الترم وسلمت اختباراتهم وكل شي ومشيت 

وللأن اوراقي حق الخبره عندهم ماخذتها :( 

مبسوطه اني عشت هذه التجربه عشان ما ألوم نفسي كل مره واقول 

ليه ماتقدمي علي مدارس خاصه 

*****

من المشتريات اللي غيرت حياتي منجد 

هي ماكينه القهوه ( دولسي غوستو ) 

يعني ايش اقولكم اكثر من اني كنت انسانه اعشق الشاهي والقهوه العربي 

الكوفي والكابتشينو وذي الخرابيط ماتعني لي كثير وماكنت استمتع فيها 

الآن 

كل شي تغير ادمنت الكوفي الدارك بكل انواعه 

بالآخص امريكانو ،اسبريسو 

صرت كل ماصحيت اخذلي كوب ابدأ يومي فيه جد تغيررت كثير معاها 

وعملت عنها موضوع فيه كل التفاصيل 

وهذا الرابط 

My Dolce Gusto ♥

وعلى فكره عملت آبدايت عالنكهات الجديده اللي جربتها

*******

السنه هذه صرت انسانه آبليه ميه بالميه 

لو احد يقولي قبل سنه اني حخلي اجهزتي كلها ابل بقوله طيررررر 

وليش احكم نفسي بشركه وحده 

قبل سنتين كان عندي ايفون 

وطفشت منه وغيرت لجالكسي وغيرت بعد الجالكسي لhtc 

لكن سبحان الله الواحد مايعرف المناسب الا بعد تجارب 

الجالكسي عاش سنه ومات خلاص لو ايش تسوين له مايصحى هههههه 

الHTC  مره ماتقبلته هو نظام اندرويد بس ماحبيته احسه رجالي 

ويقهر ماتلاقين له ولا كفر نااادر مره 

ليش غيرت الطقم كله لآبل 

لانه بصراحه اجود بكثير اضمن بإذن الله يعيشو معايا سنين 

متطور 

آمن 

اقدر اربط اجهزتي كلها ببعض ويصير سهل عليا انقل الصور والبرامج  

برامجه ممتااااازه بالذات بالفوتو والفيديو والصوت يعني ناس بروفيشنال 

ومنتجين كبار يستخدمو ابل 

********

ميموري فلاش اير 

منجد افضل شي اشتريته ساعدني كثيررررر بنقل الصور عن طريق الواي فاي 

صرت اصور بالكام بكل سهوله بدون ما اشيل هم النقل 

حتى لو كنت بمطعم ولا بره على طول اصور وآنقلها عالايفون وواشاركها معاكم ماياخذ دقايق 

******

نجي عند الشغلات الجماليه 

لايغركم اني اجرب كثير 

بس قليل اللي يدخل مزاجي مزبوط واحس  اني مستحيل استغنى عنه 

دحين بعطيكم الزبده 

ماسكرا وبرونز شانيل فقعت راسكم فيها ههههههه 

تكلمت عنهم هنا 

My Chanel choices

باليت لوراك على اني صورته وهو وسخ بس قلت احسن عشان تشوفو لما اقولكم تغليفه المطفي مستفز يخلي الباليت 

دايم وسخ 

تكملت عنه بالتفصيل هنا 

LORAC Mega Pro Palette

مناكير لوبوتان ( عشق وربي ) 

تفاصيل اكثر هنا 

Christian Louboutin nail polish

مرطب ليب قلو و برايمر العين من ديور 

بتلاقوهم هنا 

Dior Backstage pros . first impression

جل الصبار تكلمت عنه بالأنستغرام وبرضو هنا بالمدونه 

lenoshop ♥ متجر لينو الكوري

بالآخير روج من ماك ماتكلمت عنه ودايم بقولكم عليه بس انسى أصوره 

يجنن 

لونه جدااا عملي احسه من الآلوان اللي دايم كنت ادور عليها 

اسمه كابتيف captive

هذا سواتش من النت 

********

من اهم اغراض العناية بالوجه 

هي الكلاراسونك بصراحه جدا جدا مهمه وتكلمت عنها بالتفصيل هنا 

Clarisonic VS Sigma

هي هذه ابرز التجارب و المنتجات اللي حبيتها بسنه ٢٠١٤

واتمنى من كل قلبي 

انو تكون سنه ٢٠١٥ سنه سعيده للكل 

وتجارب مفيده لي ولكم بكل المجالات ان شاء الله 

لاتخافو تجربو شي جديد

جربي عشان تعرفي حيعجبك ولا لا 

جربي عشان ماتلومي نفسك بعدين

جربي عشان تكسبي خبره اكبر 

بالتوفيق لي ولكم حبيباتي 

وسنه سعيده عالجميع يارب 

and welcome 2015